جالندھر:پنجاب میں موسلادھار بارش نے حالات مزید خراب کردیے۔ دریاوں کے پانی کی سطح میں مسلسل اضافہ ہورہا ہے اور کئی اضلاع سیلاب کی زد میں آ چکے ہیں۔ اب جالندھر میں بھی سیلاب کا خطرہ گہرا ہونے لگا ہے۔ دریائے ستلج میں پانی کی سطح تیزی سے بڑھنے کے بعد نشیبی علاقوں میں پانی بھرنا شروع ہوگیا ہے۔
موصولہ اطلاعات کے مطابق گدر پنڈی-مکھو ریلوے لائن پر پل نمبر 84 پر پانی کی سطح خطرے کے نشان کو چھونے لگی ہے۔ ریلوے حکام نے حفاظت کو مدنظر رکھتے ہوئے احتیاط کے طور پر کئی ٹرینوں کو منسوخ کر دیا ہے۔ کچھ ٹرینوں کو مختصر کر دیا گیا ہے (سفر درمیان میں روک دیا گیا ہے)، مختصر شروع کیا گیا ہے (آدھے راستے سے شروع ہوا ہے) اور کچھ کا رخ موڑ دیا گیا ہے۔
بتادیں کہ سیلاب کے بڑھتے ہوئے خطرے سے جالندھر اور آس پاس کے علاقوں میں عام لوگوں کی زندگی متاثر ہونے لگی ہے۔ نشیبی علاقوں میں پانی بھر جانے کے باعث لوگوں نے محفوظ مقامات کی طرف نقل مکانی شروع کر دی ہے۔ کئی مقامات پر سڑکیں بند ہیں جس سے لوگوں کو آنے جانے میں مشکلات کا سامنا ہے۔ تاہم انتظامیہ اور امدادی ٹیمیں حالات پر مسلسل نظر رکھے ہوئے ہیں۔ مقامی لوگوں کو دریا کے قریب نہ جانے کا مشورہ دیا گیا ہے۔ اس کے علاوہ نشیبی علاقوں میں رہنے والے لوگوں کو محفوظ مقامات پر منتقل کرنے کی تیاریاں کی جا رہی ہیں۔