نئی دہلی:قومی شہریت قانون( سی اے اے )، قومی شہری رجسٹر (این آر سی ) اور قومی آبادی رجسٹر (این پی آر)کے خلاف شاہین باغ میں خواتین مظاہرین کی حمایت کرتے ہوئے سوراج ابھیان کے صدر یوگیندریادو نے کہا کہ میں یہاں ملک اور آئین کو بچانے کے لئے یہاں آیا ہوں ۔یہ بات انہوں نے شاہین باغ خواتین مظاہرین سے خطاب کرتے ہوئے کہی۔
انہوں نے خواتین کے جذبے کو سلام کرتے ہوئے کہاکہ خواتین آئین کی حفاظت کے لئے اس سخت سردی کے موسم میں آرام و آسائش کو چھوڑ کر دن رات کا دھرنا دے رہی ہیں۔ انہوں نے کہاکہ خواتین کا یہ جذبہ پورے ملک کے لئے ایک مثال ہے۔ انہوں نے کہاکہ آج کا وقت ملک کو بچانے کا ہے اور میں بھی آپ لوگوں کے درمیان ہندوستان کو اور اس کے آئین کو بچانے کے لئے آیا ہوں ۔
کل ہند مسلم یوتھ فورم کے سرپرست ٹی ایم ضیا الحق نے مظاہرہ میں شرکت کرتے ہوئے کہا کہ شاہین باغ کا خواتین مظاہرہ پوری دنیا کو پیغام دے گا کہ یہاں کی خواتین کسی طرح بھی اپنے حقوق اور ملک کے آئین کی حفاظت میں کسی سے پیچھے نہیں ہیں۔ انہوں نے کہاکہ حکومت کا یہ نہ صرف جابرانہ ہے بلکہ ملک کے لئے تباہ کن بھی ہے اور یہ صرف مسلمانوں کے خلاف ہی نہیں ہے بلکہ ہندؤوں کے بھی خلاف ہے۔