واشنگٹن: وینزویلا کے صدر نکولس مادورو کو حراست میں لے کر نیویارک منتقل کرنے کے امریکی فوجی آپریشن کا براہ راست اثر کیریبین خطے کی فضائی آمد و رفت پر پڑا۔ سکیورٹی وجوہات کی بنا پر عائد پابندیوں کے باعث کئی ممالک اور جزیروں کے لیے پروازیں منسوخ کرنا پڑیں، جس سے مسافروں کو شدید مشکلات کا سامنا کرنا پڑا۔ امریکہ نے ہفتہ کی علی الصبح ایک اچانک فوجی کارروائی میں مادورو اور ان کی اہلیہ کو ایک فوجی اڈے میں واقع ان کی رہائش گاہ سے گرفتار کیا۔ اس کے بعد امریکی فیڈرل ایوی ایشن ایڈمنسٹریشن نے سکیورٹی کے پیش نظر وینزویلا کی فضائی حدود اور اس کے اطراف کے علاقوں میں پروازوں پر عارضی پابندیاں عائد کر دیں۔
پروازوں کی نگرانی کرنے والی ویب سائٹ فلائٹ ریڈار 24 ڈاٹ کام کے مطابق جس دن یہ فوجی آپریشن ہوا اس دن کوئی بھی تجارتی طیارہ وینزویلا کی فضائی حدود کے اوپر سے نہیں گزرا۔ ایف اے اے کے احکامات کے بعد بڑی بین الاقوامی اور علاقائی ایئرلائنز نے مشرقی کیریبین خطے میں سینکڑوں پروازیں منسوخ کر دیں۔ ان پابندیوں کا اثر پیورٹو  ریکو، آروبا اور وینزویلا کے شمال میں واقع لیسر اینٹیلز کے بارہ سے زائد جزیروں پر دیکھا گیا۔ کئی مسافر ہوائی اڈوں پر پھنس کر رہ گئے، جبکہ ایئرلائنز نے خبردار کیا کہ یہ خلل چند دن تک جاری رہ سکتا ہے۔ تاہم امریکی وزیر ٹرانسپورٹیشن سین ڈفی نے ہفتہ کی رات کہا کہ یہ پابندیاں مقامی وقت کے مطابق آدھی رات کو ختم ہو جائیں گی اور ایوی ایشن کمپنیاں اتوار سے بتدریج معمول کی پروازیں دوبارہ شروع کر سکیں گی۔
ساؤتھ ویسٹ ایئرلائنز نے مسافروں کی سہولت کے لیے پیورٹو ریکو کے لیے اتوار کو چھ اضافی اور پیر کو آٹھ اضافی پروازیں چلانے کا اعلان کیا ہے۔ اس کے علاوہ آروبا کے لیے بھی اتوار کو دو اضافی پروازیں مقرر کی گئی ہیں۔ آروبا کے کوئین بیٹرکس بین الاقوامی ہوائی اڈے کے حکام نے بتایا کہ پروازیں منسوخ ہونے کے باعث بڑی تعداد میں مسافر پھنس گئے تھے، لیکن اتوار سے حالات معمول پر آنے کی امید ہے۔ قابل ذکر ہے کہ وینزویلا کے ساحل سے تقریبا 24 کلومیٹر دور واقع آروبا امریکی سیاحوں کے لیے ایک مقبول تفریحی مقام سمجھا جاتا ہے۔