انٹر نیشنل ڈیسک : خلیجی ملک عمان نے اپنی آنے والی نسلوں کی صحت کو محفوظ بنانے کے لیے ایک تاریخی قدم اٹھایا ہے۔ یکم جنوری 2026 سے عمان میں شادی کرنے کا ارادہ رکھنے والے ہر جوڑے کے لیے شادی سے پہلے  میڈیکل ٹیسٹ (طبی معائنہ) لازمی قرار دے دیا گیا ہے۔
سلطان ہیثم بن طارق کی جانب سے جاری کردہ رائل ڈکری نمبر 111/2025 کے تحت یہ قانون نافذ کیا گیا ہے۔ اب چاہے شادی عمان کے اندر ہو یا بیرونِ ملک، نکاح نامے پر دستخط کرنے سے پہلے دونوں شریکِ حیات کے لیے یہ ٹیسٹ پاس کرنا ضروری ہوگا۔ اگر جوڑے میں سے کوئی ایک غیر ملکی شہری بھی ہو تب بھی یہ قانون لازمی طور پر نافذ ہوگا۔

اس ٹیسٹ میں کن بیماریوں کی جانچ ہوگی؟
عمان کی وزارتِ صحت نے اس اسکریننگ عمل کو دو بنیادی زمروں میں تقسیم کیا ہے۔
1   .موروثی خون کی بیماریاں  (Genetic Blood Disorders) : عمان میں قریبی رشتہ داروں کے درمیان شادی کا رجحان زیادہ ہونے کے باعث موروثی بیماریاں  (Genetic Disorders) نسل در نسل منتقل ہوتی ہیں۔ اعداد و شمار کے مطابق عمان کی تقریبا 9.5 فیصد آبادی ان بیماریوں سے متاثر ہے۔
سِکل سیل انیمیا (Sickle Cell Anemia)  : اس بیماری میں سرخ خون کے خلیے درانتی  کی شکل اختیار کر لیتے ہیں۔
تھیلیسیمیا (Thalassemia) : اس میں جسم میں ہیموگلوبن بننے کی مقدار کم ہو جاتی ہے۔
2  . متعدی بیماریاں (Infectious Diseases) : یہ جانچ اس لیے کی جاتی ہے تاکہ بیماریاں ایک شریکِ حیات سے دوسرے میں یا حاملہ ماں سے بچے میں منتقل نہ ہوں۔
ایچ آئی وی اور ایڈز۔
ہیپاٹائٹس بی اور سی۔

رازداری اور طریقہ کار
یہ ٹیسٹ عمان کے پرائمری ہیلتھ کیئر مراکز میں کیے جائیں گے۔ جانچ مکمل ہونے کے بعد جوڑوں کو ایک فٹنس سرٹیفکیٹ دیا جائے گا۔ رازداری کا مکمل خیال رکھتے ہوئے ٹیسٹ کی رپورٹ کسی تیسرے فرد کے ساتھ شیئر نہیں کی جائے گی۔
یہ ٹیسٹ لازمی کیوں کیا گیا؟
عمان میں یہ ٹیسٹ 1999 سے اختیاری تھا۔ لیکن اعداد و شمار نے تشویش پیدا کر دی تھی۔
کم شرکت: 2025 تک صرف 42 سے 43 فیصد لوگ ہی رضاکارانہ طور پر یہ ٹیسٹ کروا رہے تھے۔
آنے والی نسلوں کا تحفظ: وزارتِ صحت کے انڈر سیکریٹری ڈاکٹر سعید بن حارب الامکی کے مطابق اس ڈکری کا مقصد عوامی صحت کو مضبوط بنانا اور بچوں کو پیدائشی بیماریوں سے محفوظ رکھنا ہے۔

دیگر ممالک کی صورتِ حال
عمان واحد ملک نہیں ہے۔ خلیج کے دیگر ممالک میں بھی یہ قانون پہلے سے نافذ ہے۔
سعودی عرب: یہاں 2004 سے سِکل سیل اور تھیلیسیمیا کے ٹیسٹ لازمی ہیں۔
متحدہ عرب امارات: متحدہ عرب امارات نے 2025 سے اپنی جانچ کا دائرہ وسیع کر دیا ہے جہاں اب 570 جینز کے ذریعے 840 سے زائد بیماریوں کی شناخت کی جاتی ہے۔