پشاور: ایک بڑی کارروائی میں پاکستان کی سکیورٹی فورسز نے تحریک طالبان پاکستان (ٹی ٹی پی)کے 41  دہشت گردوں کو ہلاک کردیا ہے۔ یہ مقابلہ جمعہ کی رات قبائلی ضلع شمالی وزیرستان کے علاقے بیبک گھر میں ہوا۔ حکام نے بتایا کہ یہ بھاری ہتھیاروں سے لیس دہشت گرد افغانستان سے پاکستان میں دراندازی کی کوشش کر رہے تھے۔ جیسے ہی وہ سرحد عبور کر کے بیبک گھر علاقے کے قریب پہنچے تو سیکورٹی فورسز نے انہیں گھیر لیا۔ وارننگ کے باوجود دہشت گردوں نے فائرنگ شروع کردی جس کے بعد جوابی کارروائی میں بڑی تعداد میں دہشت گرد مارے گئے۔
ایک سینئر اہلکار نے بتایا کہ مارے گئے دہشت گردوں میں زیادہ تر افغان شہری تھے۔ مقابلے کے بعد پورے علاقے میں سرچ آپریشن شروع کیا گیا تاکہ کوئی دہشت گرد فرار نہ ہو سکے۔ حکام نے یہ بھی بتایا کہ اس آپریشن کے دوران سیکورٹی فورسز نے بھاری مقدار میں اسلحہ اور گولہ بارود بھی برآمد کیا ہے۔ تحریک طالبان پاکستان (ٹی ٹی پی)ایک کالعدم دہشت گرد تنظیم ہے، جو حالیہ برسوں میں پاکستان کے سرحدی علاقوں میں حملے اور دراندازی کی وارداتیں کرتی رہی ہے۔ حال ہی میں ٹی ٹی پی نے پاکستان میں کئی خودکش حملوں اور سکیورٹی فورسز پر حملوں کی ذمہ داری بھی قبول کی تھی۔
حکومت پاکستان نے افغانستان کی طالبان حکومت سے متعدد بار مطالبہ کیا ہے کہ وہ ٹی ٹی پی کے دہشت گردوں کو اس کی سرزمین سے پاکستان میں دراندازی سے روکے لیکن اب تک اس سمت میں بہت محدود پیش رفت ہوئی ہے۔ اس تازہ واقعے کے بعد پاکستان کے سرحدی علاقوں میں ہائی الرٹ کا اعلان کر دیا گیا ہے۔ فوج اور دیگر سیکورٹی فورسز نے سرحدوں پر گشت بڑھا دیا ہے اور حساس علاقوں میں اضافی تعیناتی کی گئی ہے۔