لندن: برطانیہ اور آئرلینڈ میں طوفان ”فلورس” کے باعث نظام زندگی بری طرح متاثر ہو گیا۔ بین الاقوامی خبر رساں ایجنسی کی رپورٹ کے مطابق تیز ہواوں اور موسلا دھار بارش کے باعث متعدد پروازیں، ٹرینیں اور کشتیاں منسوخ کی جاچکی ہیں جبکہ تفریحی تقریبات کو ملتوی کردیا گیا ہے۔ طوفان فلورس کے باعث آئرلینڈ، اسکاٹ لینڈ، شمالی انگلینڈ اور یارکشائر میں تیز ہواوں کا الرٹ جاری کیا جا چکا ہے،

یارکشائر کے کئی تفریحی مقامات بند کر دیے گئے ہیں، جبکہ درخت گرنے اور سڑکوں پر رکاوٹوں کی وجہ سے ٹریفک کی روانی متاثر ہوچکی ہے۔ گلاسگو سے اسکاٹش جزیروں کی جانب تمام پروازیں منسوخ کر دی گئی ہیں۔ نیو کیسل کے شمال میں ریلوے سروسز بند کر دی گئی ہیں، پریسٹن کے شمال میں ریلوے مسافروں کو سفر نہ کرنے کی ہدایت دی گئی ہے۔ برطانیہ کے مختلف حصوں میں ایمبر اور یلو وارننگز جاری کر دی گئی ہیں۔

اسکاٹ لینڈ میں صبح 10 بجے سے ایمبر وارننگ نافذ ہے جبکہ شمالی انگلینڈ، ویلز اور شمالی آئرلینڈ میں صبح 6 بجے سے یلو وارننگ جاری کی گئی۔ ڈرائیوروں کو سخت احتیاطی تدابیر اختیار کرنے کی ہدایت کی گئی ہے۔ ایڈنبرا میں واقع پرنسز اسٹریٹ گارڈنز بند کر دیے گئے جبکہ نارتھ بیروک میں ہونے والا ”فرنج بائے دی سی” فیسٹیول بھی ملتوی کر دیا گیا۔