بھوپال: مدھیہ پردیش کی راجدھانی بھوپال کی سابق بی جے پی رکن پارلیمنٹ پرگیہ سنگھ ٹھاکر نے کتھا واچک انیردھ آچاریہ کے لِو-اِن ریلیشن کے حوالے سے دیے گئے متنازع بیان کی حمایت کی ہے۔ پرگیہ ٹھاکر نے کہا کہ جب ماں باپ بچوں کو سنسکار (اقدار) نہیں دے پاتے، تو بچیاں نیم برہنہ دکھائی دیتی ہیں اور اس سے سماج میں بداخلاقی بھی بڑھتی ہے۔ پرگیہ ٹھاکر 31 جولائی کو مالیگاؤں بم دھماکہ کیس سے بری ہونے کے بعد ورِنداون پہنچیں۔ یہاں انہوں نے گوری گوپال آشرم میں کتھا واچک انیردھ آچاریہ سے ملاقات کی۔ اس دوران ان کی بہن اوپما سنگھ ٹھاکر بھی موجود تھیں۔

 انیردھ آچاریہ کے بیان کی حمایت
پرگیہ ٹھاکر نے کہا کہ انیردھ آچاریہ نے جو کہا، وہ سماج کی حقیقی صورت حال کو ظاہر کرتا ہے۔ انہوں نے کہا، جب سماج میں اس طرح کے منظرنامے بڑھنے لگتے ہیں، تو بداخلاقی کے واقعات بھی بڑھتے ہیں۔ ماں کو بیٹیوں کو حدود(مریادا)سکھانی چاہیے اور باپوں کو بیٹوں کو نظم و ضبط کی اہمیت سمجھانی چاہیے۔ بیٹا-بیٹی دونوں پر یکساں اصول لاگو ہوں۔
انہوں نے آگے کہا کہ گھر واپس آنے کا وقت ہو یا نظم و ضبط سے جڑے اصول، یہ سبھی بچوں پر یکساں طور پر لاگو ہونے چاہئیں۔ اگر ایسا نہیں ہوگا تو سماج میں بگاڑ اور مغربی سوچ بڑھے گی، اور رشتوں کی پہچان تک مشکل ہو جائے گی۔
 لِو-اِن پر مخالفت
پرگیہ ٹھاکر نے کہا کہ چاہے عدالت کچھ بھی کہے، لیکن سناتن دھرم میں لِو-اِن رشتے قابل قبول نہیں ہیں۔ انہوں نے کہا کہ الفاظ کی حدود میں رہنا ضروری ہے اور اس طرح کی رسموں کی مخالفت ہونی چاہیے۔ پرگیہ ٹھاکر نے مشترکہ خاندان کو بچوں کی نشوونما کے لیے ضروری بتایا۔

انہوں نے کہا کہ  گجرات میں اس کے اچھے مثالیں ہیں، جہاں زیادہ تر لوگ مشترکہ خاندان میں رہتے ہیں۔ اتر پردیش اور راجستھان میں بھی کچھ حد تک یہ روایت دکھائی دیتی ہے، لیکن کئی ریاستوں میں لوگ اکیلے رہنا پسند کرتے ہیں۔
 انیردھ آچاریہ کا متنازع بیان
قابل ذکر ہے کہ گزشتہ ماہ کتھا واچک انیردھ آچاریہ نے لِو-اِن ریلیشن کے حوالے سے قابل اعتراض تبصرہ کیا تھا۔ انہوں نے کہا تھا کہ  25 سال کی لڑکیاں کئی رشتوں سے گزر چکی ہوتی ہیں۔  ان کا یہ بیان سوشل میڈیا پر وائرل ہوا اور تنازعات میں آ گیا تھا۔