کولمبو: سری لنکا کی پولیس نے ہفتہ کے روز چنئی سے کولمبو آنے والی پرواز کی تلاشی لی ، کیونکہ ا سکو  اطلاع ملی تھی کہ  پہلگام دہشت گردانہ حملے سے منسلک ایک مشتبہ فلائٹ میں سوار ہو سکتا ہے۔ پولیس ترجمان نے یہ اطلاع دی۔ قومی کیریئر سری لنکن ایئر لائنز کی طرف سے جاری کردہ ایک بیان میں کہا گیا ہے کہ اس کی پرواز کولمبو کے بندرانائیکے بین الاقوامی ہوائی اڈے پر چنئی سے مقامی وقت کے مطابق صبح 11:59 پر پہنچی اور پہنچنے پر اس کی وسیع حفاظتی جانچ کی گئی۔
بیان میں کہا گیا ہے کہ"چنئی ایریا کنٹرول سینٹر کی جانب سے ہندوستان میں مطلوب ایک مشتبہ شخص کے بارے میں الرٹ کیے جانے کے بعد مقامی حکام کے ساتھ مل کر تلاشی لی گئی، جس کے بارے میں خیال کیا جاتا تھا کہ وہ طیارے میں سوار تھا۔" بیان میں کہا گیا کہ طیارے کی مکمل جانچ پڑتال کی گئی اور بعد میں اسے مزید کارروائیوں کے لیے کلیئر کر دیا گیا۔ 22 اپریل کو جموں و کشمیر کے پہلگام میں دہشت گردوں نے 26 لوگوں کو ہلاک کیا، جن میں زیادہ تر سیاح تھے۔
ہندوستانی حکام نے پہلگام حملے کے ذمہ دار پانچ دہشت گردوں کی شناخت کی ہے - جن میں تین پاکستانی شہری بھی شامل ہیں۔ بھارتی وزیر اعظم نریندر مودی نے 24 اپریل کو پہلگام حملے میں ملوث دہشت گردوں اور اس کی سازش میں ملوث افراد کو ان کے تصور سے باہر کی سزا دینے کا عزم کیا۔ انہوں نے کہا کہ ملک کے دشمنوں نے نہ صرف غیر مسلح سیاحوں کو نشانہ بنایا بلکہ وہ ہندوستان کی روح پر حملہ کرنے کی جرات بھی رکھتے ہیں۔