لکھنؤ : سماج وادی پارٹی کی سینئر رکنِ پارلیمنٹ اور پارٹی صدر اکھلیش یادو کی اہلیہ ڈمپل یادو کی ایک مبینہ قابلِ اعتراض تصویر سوشل میڈیا پر وائرل ہونے کے بعد سیاسی اور سماجی حلقوں میں ہلچل مچ گئی ہے۔ الزام ہے کہ یہ تصویر ان کی ذاتی زندگی میں مداخلت کرنے اور انہیں بدنام کرنے کے ارادے سے لی گئی اور وائرل کی گئی۔ معاملے کی سنگینی کو دیکھتے ہوئے کانپور نگر کے سائبر کرائم تھانے میں ایف آئی آر درج کی گئی ہے۔
پارٹی رہنما نے شکایت درج کرائی
اس معاملے میں سماج وادی پارٹی کے قومی سکریٹری پروین یادو نے سائبر تھانے میں شکایت دی ہے۔ انہوں نے بتایا کہ 27 دسمبر کو سوشل میڈیا پر انڈین اسٹوری نام کے ایک اکاؤنٹ سے ڈمپل یادو اور ان کی بیٹی کی ایک نجی تصویر شیئر کی گئی۔ الزام ہے کہ یہ تصویر چوری چھپے لی گئی اور جان بوجھ کر وائرل کی گئی، جس سے ان کی رازداری کو ٹھیس پہنچی ہے۔
رازداری کے حق کی سنگین خلاف ورزی
شکایت میں کہا گیا ہے کہ تصویر میں ڈمپل یادو نہانے کی حالت میں نظر آ رہی ہیں اور ان کی بیٹی بھی اسی جگہ موجود بتائی جا رہی ہے۔ اسے بھارتی آئین کے آرٹیکل 21 کے تحت ملنے والے رازداری کے حق کی براہِ راست خلاف ورزی قرار دیا گیا ہے۔ ساتھ ہی یہ معاملہ انفارمیشن ٹیکنالوجی ایکٹ کی دفعہ 66E، 67، 67A اور بھارتی تعزیراتی قانون کی دفعہ 74 کے تحت سنگین جرم کے زمرے میں آتا ہے۔
خواتین کی سلامتی سے جڑا معاملہ
پروین یادو نے کہا کہ یہ معاملہ صرف ایک رکنِ پارلیمنٹ کی شبیہ خراب کرنے کا نہیں ہے بلکہ عوامی زندگی میں سرگرم خواتین کی رازداری اور سلامتی سے بھی جڑا ہوا ہے۔ انہوں نے پولیس سے مطالبہ کیا ہے کہ وائرل مواد کو فوری طور پر تمام سوشل میڈیا پلیٹ فارمز سے ہٹوایا جائے اور قصورواروں کے خلاف سخت قانونی کارروائی کی جائے۔
پولیس جانچ میں مصروف
سائبر کرائم تھانے کے انچارج نے بتایا کہ یہ تصویر کافی عرصے سے سوشل میڈیا پر وائرل ہو رہی ہے۔ معاملے کی جانچ کی جا رہی ہے اور متعلقہ پلیٹ فارمز سے معلومات طلب کی گئی ہیں۔ جواب موصول ہونے کے بعد آگے کی کارروائی کی جائے گی۔
 واضح رہے کہ ڈمپل یادو مین پوری لوک سبھا حلقے سے رکنِ پارلیمنٹ ہیں۔ وہ اتر پردیش کے سابق وزیرِ اعلی اور سماج وادی پارٹی کے صدر اکھلیش یادو کی اہلیہ ہیں اور مرحوم ملائم سنگھ یادو کی بہو بھی ہیں۔