نیشنل ڈیسک: بہار کے وزیر اعلی نتیش کمار کی جانب سے ایک خاتون کے چہرے سے نقاب ہٹائے جانے اور پھر اس پر اتر پردیش کے ایک وزیر کے تبصرے سے پیدا ہونے والے تنازع کے درمیان اے آئی ایم آئی ایم کے رہنما امتیاز جلیل نے کہا ہے کہ جو بھی شخص مسلم خواتین کو غلط نیت سے چھونے کی ہمت کرے گا، وہ اس کا ہاتھ کاٹ دیں گے۔ جلیل نے جمعہ کو مہاراشٹر کے جلنا میں ایک ریلی سے خطاب کرتے ہوئے کہا کہ نام نہاد سیکولر پارٹیاں غنڈوں اور مجرمانہ عناصر کا ساتھ دیتی ہیں، لیکن مسلمانوں کی حمایت کرنے سے ہچکچاتی ہیں۔ انہوں نے حجاب تنازع کو لے کر نتیش کمار پر نشانہ سادھا۔ اورنگ آباد کے سابق رکن پارلیمنٹ نے کہا، اتر پردیش کے ایک وزیر نے قابل اعتراض بیان دیا تھا۔ اگر کوئی بھی مسلم بہن کو غلط نیت سے چھونے کی ہمت کرے گا تو میں اس کا ہاتھ کاٹ دوں گا۔
اتر پردیش کے وزیر سنجے نشاد نے نتیش کمار سے جڑے حجاب تنازع کے سلسلے میں کہا تھا، اگر انہوں نے اسے کہیں اور چھوا ہوتا تو کیا ہوتا۔ نشاد کے اس بیان سے ہنگامہ کھڑا ہو گیا تھا۔ تاہم نشاد کی پارٹی نے بعد میں وضاحت دی کہ ان کے بیان کو توڑ مروڑ کر پیش کیا گیا اور غلط مطلب نکالا گیا۔ جلیل نے پندرہ جنوری کو ہونے والے جلنا میونسپل کارپوریشن انتخابات میں اے آئی ایم آئی ایم کے 17  امیدواروں کے لیے مہم چلائی۔
انہوں نے کہا، سیکولر پارٹیاں اکثر اے آئی ایم آئی ایم کو فرقہ پرست اور اچھوت پارٹی بتاتی ہیں، جبکہ حقیقت میں وہ خود سب سے زیادہ فرقہ پرست ہیں اور مسلمانوں کو لیڈر بننے نہیں دینا چاہتیں۔ جلیل نے کہا، غنڈوں اور مجرمانہ عناصر کا ساتھ دینے میں انہیں کوئی جھجک نہیں ہوتی، لیکن مسلمانوں کے ساتھ کھڑے ہونے یا مسلم برادری کو مناسب نمائندگی دینے میں وہ ہچکچاتے ہیں۔