شملہ:  اطلاعات و نشریات اور کھیل کے مرکزی وزیر انوراگ سنگھ ٹھاکر نے کہا کہ کھیل کسی فرد اور قوم کی تعمیر کی مجموعی ترقی میں اہم کردار ادا کرتے ہیں مسٹر ٹھاکر نے کہا کہ وہ ہمیر پور پارلیمانی حلقہ اور ہماچل پردیش میں کھیلوں اور کھلاڑیوں کو فروغ دینے اور انہیں ایک پلیٹ فارم فراہم کرنے کی مسلسل کوشش کر رہے ہیں۔
 گاؤں اور پنچایت کی سطح پر بہت سے منفرد ہنر موجود ہیں جنہیں دریافت کرنے اور انہیں سامنے لانے کے لیے صرف ایک پلیٹ فارم کی ضرورت ہے اور سنسد کھیل مہاکمبھ اس سمت میں ایک منفرد کوشش ہے۔
انہوں نے کہا کہ اس بات کو یقینی بنایا گیا ہے کہ کھلاڑیوں کو بہترین پلیٹ فارم ملے، وہ کھیلوں کو کیریئر کے طور پر دیکھیں اور اس بات کو بھی یقینی بنایا گیا ہے کہ تمام کھلاڑیوں کو اسپورٹس کٹس، سرٹیفکیٹس اور میڈلز کے ساتھ نقد انعامات بھی فراہم کیے جائیں۔
مسٹر ٹھاکر نے کہا کہ یہ ہمیرپور اور یہاں کے نوجوانوں کے لیے فخر کی بات ہے کہ 2018 میں ہمیر پور سے جو سفر شروع کیا گیا تھا وہ آج ملک کے کونے کونے میں پھیل چکا ہے۔ ہمارے سنسد کھیل مہاکمبھ ماڈل کی مقبولیت کا اندازہ اس بات سے لگایا جا سکتا ہے کہ آج ملک کی ہر ریاست کے ممبران پارلیمنٹ اپنی اپنی ریاستوں میں کھیل مہاکمبھ کا انعقاد کر رہے ہیں، جس میں خود وزیر اعظم  نریندر مودی نے کھلاڑیوں سے خطاب کیا اور کئی پروگراموں میں ان کی حوصلہ افزائی کی۔
  آج کے پروگرام میں 21 لاکھ سے زائد کی نقد انعامی رقم کھلاڑیوں کی حوصلہ افزائی کرے گی۔ یہ خوشی کی بات ہے کہ اس سال کے کھیل مہاکمبھ میں بہت سے قومی اور بین الاقوامی ہنر اس کھیل کا حصہ بنے ہیں۔
مسٹر ٹھاکر نے کہا کہ 2047 میں ہمارا ہندوستان آزادی کے 100 سال کا جشن منائے گا۔ وزیر اعظم نریندر مودی نے اگلے 25 سالوں کو امرت کال قرار دیا ہے۔ ایک ایسا سفر جو یہ ثابت کرے گا کہ 21ویں صدی درحقیقت ہندوستان کی صدی ہے۔ 
ایونٹ میں پانچ کھیلوں میں مجموعی طور پر 2300 سے زائد ٹیموں نے حصہ لیا ہے۔ ترغیب کے طور پر تمام ٹیموں کو نقد انعامی رقم دی جائے گی۔ ان میں بلاک سطح پر جیتنے والی 85 ٹیموں کو 5100 روپے، فرسٹ رنر اپ کو 3100 روپے اور سیکنڈ اور تھرڈ رنر اپ کو بھی 2100 روپے دیے جا رہے ہیں۔