کوٹہ: راجستھان کے کوٹہ ضلع کے جے کے لون ہسپتال میں تین اور بچوں کی موت ہو گئی ہے۔اس کے ساتھ ہی ہسپتال میں مرنے والے معصوم بچوں کی تعداد 103 ہو گئی ہے۔بتا دیں کہ اس سے پہلے دسمبر کے آخری 2 دن میں کم از کم 9 اور بچوں کی موت ہو گئی تھی جس سے مرنے والے  بچوں کی تعداد  100  ہو گئی تھی۔گزشتہ 23-24 دسمبر کو 48 گھنٹے کے اندر ہسپتال میں 10 بچوں کی موت کو لے کر کافی ہنگامہ ہوا تھا۔تاہم، ہسپتال کے حکام نے کہا تھا کہ یہاں 2018 میں 1,005 بچوں کی موت ہوئی تھی اور 2019 میں اس سے کم اموات ہوئی ہیں۔

ہسپتال کے سپرنٹنڈنٹ کے مطابق زیادہ تر بچوں کی موت بنیادی طور پیدائش کے وقت کم وزن کی وجہ سے ہوئی۔منگل کو لاکٹ چٹرجی، کانتا کردم اور جس کور مینا سمیت بی جے پی ممبران پارلیمنٹ کی ایک پارلیمانی ٹیم نے ہسپتال کا دورہ کر اس کی حالت پر تشویش ظاہر کی تھی۔ٹیم نے کہا کہ ایک ہی بیڈ پر دو تین بچے تھے اور ہسپتال میں کافی نرسیں بھی نہیں ہیں۔اس سے پہلے قومی بال حقوق تحفظ کمیشن نے ریاست کی کانگرس حکومت کو نوٹس جاری کیا تھا۔کمیشن کے صدر پرینکا قانونگو نے کہا تھاکہ ہسپتال احاطے کے اندر  سور گھومتے پائے گئے۔راجستھان حکومت کی ایک کمیٹی نے کہا کہ بچوں کا صحیح علاج کیا جا رہا ہے۔