کولکتہ:مغربی بنگال کی وزیر اعلیٰ ممتا بنرجی نے سی اے اے اور این آر سی کے بہانے مرکزی حکومت پر نشانہ لگایا ہے۔ ممتا بنرجی نے کہا کہ پرامن مظاہرین پر گولیاں چلائی جا رہی ہیں۔ ممتا نے الزام لگایا کہ بی جے پی سی اے اے اور این آر سی سے اختلاف رکھنے والے ہر شخص کو خوفزدہ کرنے کی کوشش کر رہی ہے۔ ممتا نے کہا کہ این آر سی کی وجہ سے آسام میں 100 لوگوں کی موت ہو گئی جبکہ مغربی بنگال میں 31 لوگوں کی موت ہوئی۔
ممتا بنرجی نے سی اے اے کی مخالفت کرنے والے مظاہرین کو مبینہ طور 'ملک مخالف'بتانے کے لئے بی جے پی لیڈروں پر تنقید کی اور کہا کہ دہلی کے شاہین باغ اور جامعہ ملیہ اسلامیہ کے باہر حال میں ہوئی فائرنگ پرامن مظاہرین کو دہشت زدہ کرنے کی کوشش تھی۔ وزیر اعظم نریندر مودی پر طنز کستے ہوئے بنرجی نے کہا کہ صرف انتخابات کے دوران خود کو چوکیدار بتانے والے وزیر اعظم سے الٹ وہ پورے سال لوگوں کا خیال رکھتی ہیں اور ان کے مسائل کو سنتی ہیں۔
بنرجی نے شمالی پرگنہ کے قصبہ بنگائوں میں ایک ریلی سے خطاب کرتے ہوئے کہا کہ میں اس گروپ سے تعلق نہیں رکھتی جو لوگوں میں نفرت پھیلاتا ہے۔ بی جے پی لیڈروں کے اکسانے کی وجہ سے شاہین باغ اور جامعہ ملیہ کے باہر فائرنگ کے واقعات ہوئے ہیں۔لوگوں کو دہشت زدہ کرنے کی کوشش کی جا رہی ہے۔ شاہین باغ مظاہرین کے تئیں حمایت ظاہر کرتے ہوئے ٹی ایم سی سربراہ نے کہا کہ کچھ پارٹیاں شہریت ترمیمی قانون کے معاملے پر پروپیگنڈے کرنے کی کوشش کر رہی ہیں۔