انٹرنیشنل ڈیسک: آسکر 2022 میں ول اسمتھ کے تھپڑکے واقعہ کے چند دن بعد، اکیڈمی آف موشن پکچرز آرٹس اینڈ سائنسز کے بورڈ آف گورنرز نے جمعہ (08 اپریل)کو 'دی پرسوٹ آف ہیپی نیس' اسٹار ول اسمتھ پر10 سال کے لیے پابندی عائد کر دی ہے۔
اکیڈمی کے صدر ڈیوڈ روبن نے کہا کہ اس سال آسکر تقریب کے دوران اسٹیج پر کرس راک کو تھپڑ مارنے پر وِل کو اگلے 10 سالوں تک اکیڈمی کے کسی پروگرام میں شرکت کی اجازت نہیں ہوگی۔ یہ فیصلہ بورڈ آف گورنرز کی رضامندی سے لیا گیا ہے۔ ڈیوڈ نے کہا کہ اس واقعے کے بعد ول کو ہالی وڈ کے ڈالبی تھیئٹر میں بیٹھنے کی اجازت دینے اور انہیں ایوارڈ دینے کے بعداکیڈمی تنقید کی زد میں آگئی تھی۔
آسکر تقریب کے دوران پیش آنے والے اس واقعے کے بعد اسمتھ سوشل میڈیا پر مسلسل تنقید کا نشانہ بن رہے تھے۔ تاہم بعد میں اپنی تقریر میں ول نے روتے ہوئے کرس کو اسٹیج پر تھپڑ مارنے پر سب سے معافی مانگی۔