واشنگٹن:  امریکہ نے صومالیہ کی وفاقی حکومت کو دی جانے والی ہر قسم کی امداد معطل کر دی ہے۔ وزارتِ خارجہ نے الزام عائد کیا ہے کہ صومالی حکام نے عالمی خوراک پروگرام(WFP) کے ایک امریکی مالی اعانت یافتہ گودام کو مسمار کر دیا اور غریب شہریوں کے لیے مختص 76 میٹرک ٹن غذائی امداد ضبط کر لی۔ امریکی وزارتِ خارجہ نے ایک بیان میں کہا کہ ٹرمپ انتظامیہ جان بچانے والی امداد کے ضیاع، چوری اور غلط استعمال کے معاملے میں قطعی عدم برداشت کی پالیسی اپناتی ہے۔
بیان میں کہا گیا کہ وزارتِ خارجہ نے صومالی وفاقی حکومت کو فائدہ پہنچانے والے تمام موجودہ امریکی امدادی پروگرام روک دیے ہیں۔ امداد کی بحالی اس بات پر منحصر ہوگی کہ صومالی وفاقی حکومت اپنے ناقابلِ قبول اقدامات کی ذمہ داری قبول کرتی ہے اور مناسب اصلاحی اقدامات اٹھاتی ہے۔ یہ معطلی ایسے وقت میں کی گئی ہے جب ٹرمپ انتظامیہ نے امریکہ میں صومالی پناہ گزینوں اور مہاجرین پر تنقید تیز کر دی ہے۔ اس میں مینیسوٹا میں بچوں کی نگہداشت کے مراکز سے متعلق مبینہ دھوکہ دہی کے معاملات کو بڑے پیمانے پر اجاگر کرنے کے الزامات بھی شامل ہیں۔
انتظامیہ نے امریکہ آنے کے خواہش مند صومالیوں پر سخت پابندیاں عائد کی ہیں اور پہلے سے امریکہ میں مقیم افراد کے لیے وہاں رہنا مشکل بنا دیا ہے۔ فوری طور پر یہ واضح نہیں ہو سکا کہ اس معطلی سے کتنی امداد متاثر ہوگی، کیونکہ ٹرمپ انتظامیہ نے غیر ملکی امدادی اخراجات میں کمی کی ہے، امریکی بین الاقوامی ترقیاتی ایجنسی کو ختم کر دیا ہے اور ملک وار نئے اعداد و شمار جاری نہیں کیے ہیں۔ سابق ڈیموکریٹ صدر جو بائیڈن کی انتظامیہ کے آخری سال میں امریکا نے صومالیہ میں منصوبوں کے لیے ستتر کروڑ امریکی ڈالر کی امداد فراہم کی تھی، تاہم اس کا صرف ایک چھوٹا حصہ براہِ راست حکومت کو دیا گیا تھا۔
ایک امریکی عہدیدار کے مطابق یہ اقدام اس واقعے کے بعد اٹھایا گیا جس میں موغادیشو بندرگاہ اتھارٹی نے صدر حسن شیخ محمود کی ہدایت پر عالمی خوراک پروگرام کے گودام کو کسی پیشگی اطلاع یا امریکہ سمیت بین الاقوامی عطیہ دہندگان کے ساتھ رابطے کے بغیر مسمار کر دیا۔ عہدیدار نے نام ظاہر نہ کرنے کی شرط پر علاقے میں تعینات امریکی سفارت کاروں کی اندرونی رپورٹس کا حوالہ دیتے ہوئے یہ معلومات فراہم کیں۔ افریقی ملک صومالیہ دنیا کے غریب ترین ممالک میں سے ایک ہے اور دہائیوں سے مسلسل تنازعات، عدم تحفظ اور شدید خشک سالی سمیت متعدد قدرتی آفات کا سامنا کرتا رہا ہے۔