غزہ: غزہ میں سول ڈیفنس نے کہا کہ ہفتہ کو غزہ کی پٹی پراسرائیلی حملوں میں کم از کم 64 فلسطینی ہلاک ہوگئے۔ شہری دفاع کے ترجمان محمود باسل نے بتایا کہ اسرائیلی توپ خانے نے غزہ شہر کے مشرق میں واقع شجاعیہ محلے میں اپنے گھروں تک پہنچنے کی کوشش کرنے والے فلسطینیوں کے ایک گروپ پر گولہ باری کی جس کے نتیجے میں سات نوجوان ہلاک اور متعدد زخمی ہوگئے۔
 مسٹر باسل نے کہا کہ اسرائیلی فضائی حملوں میں ایک خاتون اور دو بچوں سمیت چار افراد مارے گئے، جس میں صلاح الدین اسکول کے گیٹ کو نشانہ بنایا گیا، جس میں غزہ شہر کے مغرب میں بے گھر خاندان رہائش پذیر ہیں، جب کہ پانچواں شخص شہر کے شمال میں ایک رہائشی اپارٹمنٹ پر فضائی حملے میں مارا گیا۔ 
مسٹر باسل کے مطابق فلسطینیوں کے اجتماع پر حملوں میں کم از کم 11 افراد ہلاک ہوئے، جب کہ وسطی غزہ کی پٹی کے شہر دیر البلاح میں انسانی امداد کی تقسیم کے ایک گودام پر اسرائیلی فضائی حملے میں نو افراد ہلاک ہوئے۔