نئی دہلی:خارجہ سکریٹری وکرم مسری نے پہلگام دہشت گردانہ حملے اور آپریشن سندور کے بعد ہندوستان کا موقف پیش کرنے کے لیے مختلف ممالک کے دورے پر جانے والے سات کل جماعتی پارلیمانی گروپوں میں سے تین کو منگل کو مکمل بریفنگ فراہم کی۔شیو سینا کے شری کانت شندے کی قیادت میں تین وفود، دراوڑ منیترا کزگم (ڈی ایم کے) کی کنیموزی اور جنتا دل یونائیٹڈ کے سنجے جھا کو پارلیمنٹ ہاوس میں ہونے والی میٹنگ میں بریفنگ دی گئی۔ یہ گروپ 21 سے 23 مئی کے درمیان غیر ملکی دورے پر جائے گا۔ دوسرے مرحلے میں 23 مئی کو خارجہ سکریٹری سپریا سولے، بیجینت پانڈا، روی شنکر پرساد اور ششی تھرور کی قیادت میں باقی چار گروپوں کو بریف کریں گے۔
خارجہ سکریٹری نے ’آپریشن سندور‘ اور پہلگام دہشت گردانہ حملے کے بعد ہندوستان اور پاکستان کے درمیان بڑھتی ہوئی کشیدگی کے تناظر میں مختلف ممالک کے کل جماعتی وفود کے دوروں کے مقصد کی وضاحت کی اور کہا کہ ان کا مقصد دہشت گردی کے خلاف ہندوستان کی مضبوط پالیسی کو عالمی برادری تک پہنچانا اور پاکستان کے جھوٹے دعووں کو بے نقاب کرنا ہے۔ انہوں نے زور دے کر کہا کہ ہندوستان امن چاہتا ہے لیکن دہشت گردی کے خلاف اس کا موقف مضبوط رہے گا۔
خارجہ سکریٹری نے آپریشن سندور کے بارے میں تفصیلات بتاتے ہوئے کہا کہ ہندوستان نے صرف دہشت گردوں کے بنیادی ڈھانچے کو نشانہ بنایا تھا نہ کہ شہری مقامات یا مذہبی مقامات کو۔ اس حوالے سے پاکستان کے دعوے بے بنیاد ہیں۔ کانگریس کے رکن پارلیمنٹ ششی تھرور، ترنمول کانگریس کے ابھیشیک بنرجی، آل انڈیا مجلس اتحاد المسلمین کے اسد الدین اویسی اور بی جے پی کی اپراجیتا سارنگی نے بھی میٹنگ میں شرکت کی۔