واشنگٹن: امریکہ کے صدر ڈونالڈ ٹرمپ نے ایران کو سخت انتباہ دیتے ہوئے کہا ہے کہ اگر ایران کسی بھی امریکی شہری یا امریکی املاک پر حملہ کرتا ہے تو اس کے خلاف انتہائی سنگین اور بہت بڑا حملہ کیا جائے گا۔
مسٹر ٹرمپ نے کہاایران اسے ایک انتباہ کے طور پر سمجھے کہ اگر وہ کسی بھی امریکی یا امریکی املاک پر حملہ کرتا ہے تو ہم نے 52 ایرانی مقامات کی نشاندہی کر رکھی ہے جو کہ ثقافتی طور پر ان کے لئے انتہائی اہم ہے۔
امریکی صدر نے کہاایران اس دہشت گردی کے بدلے انتہائی جرات کے ساتھ امریکہ کی کچھ املاک کو نشانہ بنانے کے بارے میں بات کر رہا ہے جس نے ایک امریکی کو مار ڈالا تھا اور کئی دوسرے لوگوں کو بری طرح سے زخمی کر دیا تھا۔
سکیورٹی ذرائع نے بتایا کہ ممکنہ جوابی کارروائی کا پہلا اشارہ دیتے ہوئے بغداد میں امریکی سفارتخانہ کے نزدیک ایک علاقے میں مورٹار کے دو گولے داغے گئے ۔ انہوں نے بتایا کہ اسی دوران امریکی فورسز کی تعیناتی والے البلاد ایئر فورس اڈے پر دو راکٹ گرائے گئے ۔ عراقی فوج نے البلاد بغداد میں میزائل حملوں کی تصدیق کی ہے اور کہا ہے کہ ان میں کسی کے مارے جانے کی خبر نہیں ہے ۔ امریکہ نے بھی کہا کہ اتحاد کا کوئی جوان نہیں مارا گیا ہے ۔