انٹرنیشنل ڈیسک: امریکہ کے صدر ڈونالڈ ٹرمپ نے ایران کو ایک بار پھر سخت وارننگ دی ہے۔ ٹرمپ نے کہا ہے کہ اگر ایران اپنے جوہری پروگرام کو دوبارہ بحال کرنے کی کوشش کرتا ہے تو امریکہ فوراً  اس پر دوبارہ حملہ کرے گا۔ یہ بیان انہوں نے پیر کے روز دیا۔
ٹرمپ یہ بات اس وقت کہہ رہے تھے جب وہ فلوریڈا میں واقع اپنے مار اے لاگو اسٹیٹ میں اسرائیل کے وزیر اعظم بنجامن نیتن یاہو کا استقبال کر رہے تھے۔ میڈیا سے گفتگو کے دوران ٹرمپ نے کہا کہ مجھے سننے میں آ رہا ہے کہ ایران ایک بار پھر اپنی طاقت بڑھانے کی کوشش کر رہا ہے۔ اگر ایسا ہے تو ہمیں اسے دوبارہ روکنا ہوگا۔ ہم انہیں زبردست طریقے سے کچل دیں گے۔
ٹرمپ کا اشارہ جون کے مہینے میں ایران پر ہونے والے امریکی حملوں کی طرف تھا جن میں ایران کے جوہری ٹھکانوں کو نشانہ بنائے جانے کا دعوی کیا گیا تھا۔ ٹرمپ نے کہا کہ امریکہ اور اس کے اتحادی پہلے بھی ایران کے خلاف کارروائی کر چکے ہیں اور اگر ضرورت پڑی تو آئندہ بھی پیچھے نہیں ہٹیں گے۔
تاہم ٹرمپ نے یہ بھی واضح کیا کہ وہ صرف فوجی کارروائی کے راستے پر ہی نہیں چلنا چاہتے۔ انہوں نے کہا کہ امریکہ اب بھی ایران کے ساتھ بات چیت اور معاہدے کے لیے تیار ہے۔ ٹرمپ کے مطابق ایک اچھا معاہدہ کرنا زیادہ دانشمندانہ قدم ہوگا۔
ان کا کہنا تھا کہ اگر ایران بات چیت کا راستہ اختیار کرتا ہے اور جوہری پروگرام کے حوالے سے شفافیت دکھاتا ہے تو کشیدگی کم ہو سکتی ہے۔ لیکن اگر ایران نے دوبارہ جوہری سرگرمیاں تیز کیں تو امریکہ سخت کارروائی کرے گا۔
ٹرمپ کے اس بیان کے بعد ایک بار پھر مغربی ایشیا میں کشیدگی بڑھنے کا خدشہ ظاہر کیا جا رہا ہے کیونکہ امریکہ، اسرائیل اور ایران کے تعلقات پہلے سے ہی انتہائی نازک بنے ہوئے ہیں۔