نیشنل ڈیسک: امریکہ کے صدر ڈونالڈ ٹرمپ نے اتوار کے روز وزیر اعظم نریندر مودی کو بورڈ آف پیس کا حصہ بننے کے لیے مدعو کیا۔ یہ ادارہ غزہ میں مستقل امن قائم کرنے اور عالمی تنازعات کے حل کے لیے ایک جرأت مندانہ نئے طریقہ کار پر کام کرے گا۔ ٹرمپ نے مودی کو ایک خط لکھا، جسے ہندوستان  میں امریکہ کے سفیر سرجیو گور نے سوشل میڈیا پر شیئر کیا۔
امریکی صدر نے خط میں کہا کہ وزیر اعظم مودی کو مشرقِ وسطی میں امن کی بحالی کے لیے ایک اہم، تاریخی اور شاندار کوشش میں شامل ہونے اور ساتھ ہی عالمی تنازعات کے حل کے لیے ایک جرأت مندانہ نئے طریقہ کار پر کام کرنے کے لیے مدعو کرنا ان کے لیے بڑے اعزاز کی بات ہے۔ ٹرمپ نے غزہ پٹی میں اسرائیل اور حماس کے درمیان جنگ بندی کے معاہدے کے دوسرے مرحلے کے تحت اس بورڈ کی نقب کشائی کی ہے ۔ اسرائیل اور حماس نے اکتوبر میں ٹرمپ کے امن منصوبے پر اتفاق کیا تھا۔ ٹرمپ نے اسی طرح کے خطوط کئی عالمی رہنماؤں کو بھیجے ہیں۔
واشنگٹن، ٹرمپ کے بورڈ آف پیس کو غزہ اور اس کے اطراف میں امن اور استحکام لانے کے لیے ایک نئے بین الاقوامی ادارے کے طور پر پیش کر رہا ہے۔ ایسی قیاس آرائیاں کی جا رہی ہیں کہ یہ ادارہ دیگر عالمی تنازعات میں بھی اہم کردار ادا کر سکتا ہے۔ بنیادی طور پر، اس نئے ادارے کو غزہ کی تعمیر نو کے لیے حکمرانی کی نگرانی اور مالی وسائل کے تال میل کا کام سونپا جانا ہے۔ اسرائیل کے دو برس کے فوجی آپریشن کے دوران غزہ پٹی مکمل طور پر تباہ ہو گئی ہے۔
گور نے ایکس پر ایک پوسٹ میں کہا کہ انہیں ٹرمپ کا دعوت نامہ مودی تک پہنچانے کا اعزاز حاصل ہوا ہے، جس میں انہیں بورڈ آف پیس میں شامل ہونے کے لیے مدعو کیا گیا ہے اور یہ ادارہ غزہ میں مستقل امن لائے گا۔ سفیر نے کہا، بورڈ استحکام اور خوشحالی حاصل کرنے کے لیے مؤثر حکمرانی کی حمایت کرے گا۔ ٹرمپ نے مودی کو لکھے گئے خط میں 29 ستمبر کو غزہ تنازع کو ختم کرنے کے جامع منصوبے کے اعلان کے ساتھ ساتھ مشرقِ وسطی میں امن لانے کے لیے اپنی 20 نکاتی حکمتِ عملی کا بھی ذکر کیا۔