اسلام آباد: پاکستان نے ہفتہ کے روز افغان سفیر کو طلب کر کے ایک دن پہلے نئی دہلی میں جاری ہندوستان -افغانستان مشترکہ بیان پر سخت اعتراض ظاہر کیا۔ افغانستان کے وزیر خارجہ امیر خان متقی جمعرات کو نئی دہلی پہنچے۔ وہ چھ روزہ ہندوستان کے دورے پر ہیں۔ پاکستان کے دفتر خارجہ نے ایک بیان میں کہا کہ ایڈیشنل سیکریٹری خارجہ (مغربی ایشیا اور افغانستان) نے مشترکہ بیان میں جموں و کشمیر کے حوالے سے افغان سفیر کو پاکستان کے سخت اعتراضات سے آگاہ کیا۔
دفتر خارجہ نے کہا، یہ بتایا گیا کہ جموں و کشمیر کوہندوستان کا حصہ قرار دینا اقوام متحدہ کی سلامتی کونسل کی متعلقہ قراردادوں کی کھلی خلاف ورزی ہے...۔ مشترکہ بیان کے مطابق، افغانستان نے اپریل میں جموں و کشمیر کے پہلگام میں ہونے والے دہشت گرد حملے کی سخت مذمت کی ہے اور ہندوستان کے عوام و حکومت سے ہمدردی اور یکجہتی کا اظہار کیا ہے۔ ہندوستان اور افغانستان کے بیان کے مطابق، دونوں فریقین نے علاقائی ممالک سے جنم لینے والے تمام دہشت گردانہ اقدامات کی واضح طور پر مذمت کی اور خطے میں امن، استحکام اور باہمی اعتماد کو فروغ دینے کی اہمیت پر زور دیا۔