اسلام آباد: ہندوستان کے ایکشن  سے مشتعل پاکستانی حکومت نے جمعرات کو ہندوستانی  ہائی کمیشن کے ایک ملازم کو ملک بدر کرنے کا اعلان کردیا۔ اس سے قبل، ہندوستان  نے بدھ کو پاکستانی ہائی کمیشن میں کام کرنے والے ایک پاکستانی اہلکار کو جاسوسی میں ملوث ہونے کے الزام میں ملک بدر کر دیا تھا۔ ہندوستان  میں گزشتہ ایک ہفتے کے دوران بے دخلی کا یہ دوسرا معاملہ ہے۔ وزارت خارجہ نے کہا تھا کہ پاکستانی ہائی کمیشن کے ایک ملازم کو اپنی سرکاری ڈیوٹی سے ہٹ کر سرگرمیوں میں ملوث ہونے پر "شخصی نان گریٹا"  (نا پسندیدہ شخص ) قرار دیا گیا ہے اور اسے 24 گھنٹوں کے اندر ہندوستان چھوڑنے کو کہا گیا ہے۔

ہندوستان نے 13 مئی کو ایک پاکستانی اہلکار کو بھی جاسوسی میں ملوث ہونے کے الزام میں ملک بدر کر دیا تھا۔ ہندوستان کی کارروائی کے بعد پاکستان نے اسلام آباد میں ہندوستانی  ہائی کمیشن میں تعینات ایک ہندوستانی  ملازم کو بھی ملک بدر کر دیا تھا۔ پاکستان کی وزارت خارجہ نے ایک بیان میں کہا کہ حکومت پاکستان نے اسلام آباد میں ہندوستانی ہائی کمیشن کے ایک ملازم کو اس کی مراعات یافتہ  پوزیشن کے خلاف سرگرمیوں میں ملوث ہونے پر ناپسندیدہ شخص  قرار دیا ہے۔ متعلقہ افسر کو 24 گھنٹے میں پاکستان چھوڑنے کی ہدایت کی گئی ہے۔ ہندوستانی  ہائی کمیشن کے انچارج کو اس فیصلے سے  آگاہ کرنے کے لیے وزارت خارجہ میں طلب کیا گیا۔
بیان کے مطابق اس بات پر زور دیا گیا کہ کوئی بھی سفارت کار یا ہندوستانی  ہائی کمیشن کا ملازم کسی بھی طرح سے اپنے مراعات اور عہدے کا غلط استعمال نہ کرے۔ پہلگام میں دہشت گردانہ حملے کے بعد ہندوستان اور پاکستان کے درمیان کشیدگی مزید بڑھ گئی ہے۔ اس حملے میں 26 لوگوں کی جانیں گئیں۔ پہلگام حملے کے جواب میں، ہندوستان نے پاکستان اور پاکستان کے زیر قبضہ کشمیر میں دہشت گردوں کے بنیادی ڈھانچے پر  اسٹیک  حملے کئے۔ اس کے بعد پاکستان نے 8، 9 اور 10 مئی کو ہندوستانی  فوجی اڈوں پر حملے کی کوشش کی۔ ہندوستان کی  جانب سے پاکستانی کارروائی کا سخت جواب دیا گیا۔ 10 مئی کو دونوں اطراف کے ڈائریکٹر جنرل ملٹری آپریشنز کے درمیان بات چیت کے بعد فوجی آپریشن روکنے کا معاہدہ طے پایا۔