انٹرنیشنل ڈیسک:  اٹلی کی انسدادِ دہشت گردی ایجنسیوں نے ایک بڑا انکشاف کرتے ہوئے حماس کو غیر قانونی طور پر فنڈنگ فراہم کرنے کے الزام میں تین خیراتی تنظیموں سے وابستہ 9 افراد کو گرفتار کیا ہے۔ استغاثہ کے مطابق ان تنظیموں نے انسانی امداد کی آڑ میں تقریبا 7 ملین یورو، (  تقریباً 82  لاکھ ڈالر) ، حماس سے منسلک نیٹ ورکس تک منتقل کیے۔ اٹلی کے استغاثہ نے بتایا کہ گرفتار شدگان میں محمد حنون بھی شامل ہے، جو اٹلی میں فلسطینی ایسوسی ایشن کا صدر ہے۔ استغاثہ نے اسے حماس کے اطالوی سیل کا سربراہ قرار دیا ہے۔ قابلِ ذکر ہے کہ یورپی یونین نے حماس کو باضابطہ طور پر ایک دہشت گرد تنظیم قرار دے رکھا ہے۔
فنڈنگ کیسے کی جاتی تھی
تحقیقات میں سامنے آیا کہ فنڈنگ کو چھپانے کے لیے بینک ٹرانسفرز اور بیرونِ ملک قائم تنظیموں کے ذریعے نام نہاد ' ٹرائینگولیشن آپریشنز ' استعمال کیے گئے۔ یہ رقم ان تنظیموں تک پہنچائی گئی جو غزہ، فلسطینی علاقوں یا اسرائیل میں قائم تھیں اور جن کے حماس سے براہِ راست یا بالواسطہ روابط تھے۔ ان میں سے کئی تنظیموں کو اسرائیل پہلے ہی غیر قانونی قرار دے چکا ہے۔
اٹلی حکومت کا سخت پیغام
اٹلی کے وزیرِ داخلہ ماتیوو  پیانتے ڈوسی نے سوشل میڈیا پلیٹ فارم ایکس پر کہا کہ یہ آپریشن ان سرگرمیوں سے پردہ اٹھاتا ہے جو فلسطینی عوام کی مدد کے نام پر دہشت گرد تنظیموں کی حمایت اور شمولیت کو چھپائے ہوئے تھیں۔
یورپی سطح پر کارروائی
اس تحقیقات میں دیگر یورپی یونین ممالک کی ایجنسیوں نے بھی تعاون کیا۔ جنوری 2025 میں یورپی کونسل نے حماس اور فلسطینی اسلامی جہاد کو فنڈنگ فراہم کرنے والے 12 افراد اور 3 اداروں پر عائد پابندیوں میں توسیع کی تھی، جس سے یہ کارروائی مزید اہم ہو جاتی ہے۔ فی الحال گرفتار ملزمان یا متعلقہ تنظیموں کی جانب سے کوئی باضابطہ ردِعمل سامنے نہیں آیا ہے۔