انٹرنیشنل ڈیسک : سنگاپور میں دیوالی کے جشن کے دوران آتشبازی کرنے کے الزام میں جمعرات کو انتالیس سالہ  ہندوستانی  نژاد ایک شخص پر مقدمہ درج کیا گیا۔ شہر میں آتشبازی پر پابندی ہے۔ چینل نیوز ایشیا کی رپورٹ کے مطابق، دلیپ کمار نرمل کمار نے پچھلے ہفتے کارلسلے روڈ کے کھلے میدان میں مبینہ طور پر آتشبازی کی، جو بندوق، دھماکہ خیز مواد اور اسلحہ کنٹرول ایکٹ 2021 کے تحت جرم ہے۔
یہ معاملہ اس وقت سامنے آیا جب آتشبازی کی ایک ویڈیو کلپ آن لائن پوسٹ کی گئی۔ رپورٹ کے مطابق، پولیس نے تصدیق کی تھی کہ رپورٹ درج کر لی گئی ہے اور تحقیقات جاری ہیں۔ دلیپ جمعرات کو ویڈیو لنک کے ذریعے عدالت میں پیش ہوئے تھے، جو حراست میں لیے گئے لوگوں کے لیے ایک طریقہ کار ہے۔ وہ بیس نومبر کو دوبارہ عدالت میں پیش ہوں گے۔ ممنوعہ دھماکہ خیز مواد کے غیر مجاز استعمال کی سزا پانچ سال تک کی قید اور ایک لاکھ سنگاپور ڈالر (ستتر ہزار امریکی ڈالر)تک کا جرمانہ ہے۔