نیشنل ڈیسک:  آپریشن سندور کے بعد ہندستان  اور پاکستان کے درمیان جنگ بندی ہونے کے باوجود پاکستان کی ہندوستان مخالف سرگرمیاں تھمنے کا نام نہیں لے رہی ہیں۔ بنگلہ دیش میں پاکستانی رہنماؤں کی سرگرمی، پاکستانی آرمی چیف جنرل عاصم منیر کا امریکی حکام سے رابطہ اور چین کی مسلسل حمایت؛ یہ سب ہندوستان  کے لیے خطرے کی گھنٹی بن رہے ہیں۔
دریں اثنا، ریزرو بینک آف انڈیا (RBI) نے ملک کے تمام سرکاری، نجی اور غیر بینکنگ مالیاتی اداروں (NBFCs) کو ایک اہم ہدایت جاری کی ہے۔ پاکستان سے بالواسطہ طور پر آنے والی رقوم کی لین دین کی مکمل چھان بین کرنے کو کہا گیا ہے۔ رائٹرز کی رپورٹ کے مطابق، آر بی آئی کا خیال ہے کہ اس طرح کی فنڈنگ ہتھیاروں کی خریداری میں استعمال کی جا سکتی ہے، جس سے اس کو   "ہائی رسک" کے زمرے میں رکھا  گیاہے۔
تحقیقات میں سامنے آئیچونکا دینے والے حقائق 
یہ ہدایت 6 اگست 2025 کو جاری کی گئی تھی۔ اس سے قبل مئی 2025 میں، ہندوستان اور پاکستان کے درمیان چار روزہ شدید فوجی تصادم کے بعد، سیکورٹی ایجنسیوں کی جانب سے کی گئی تحقیقات میں یہ خدشہ پیدا ہوا تھا کہ پاکستان دوسرے ممالک کے ذریعے فنڈز بھیج کر ہندوستان میں ہتھیاروں کی فراہمی کر رہا ہے۔
ایک سرکاری ذریعے نے رائٹرز کو بتایا کہ کچھ پاکستانی شہریوں نے دوسرے ممالک کے بینکنگ چینلز کا استعمال کرتے ہوئے رقم ہندوستان  منتقل کی۔ انہوں نے کہا کہ اس طرح کی سرگرمیاں ہندوستان کی مالی سلامتی کے لیے خطرہ بن سکتی ہیں اور دہشت گردوں کی مالی معاونت کو فروغ دے سکتی ہیں۔
آر بی آئی کا سخت موقف
آر بی آئی نے اپنے خط میں واضح کیا ہے کہ پاکستان سے آنے والے تمام بالواسطہ لین دین کا باریک بینی سے جائزہ لیا جانا چاہیے۔ معلوم ہوا ہے کہ پاکستان سے ہندوستان کو براہ راست فنڈز کی منتقلی پر پہلے ہی پابندی عائد ہے اور کسی بھی لین دین کے لیے مرکزی بینک کی اجازت لازمی ہے۔ خط میں یہ بھی بتایا گیا ہے کہ فنانشل ایکشن ٹاسک فورس (ایف اے ٹی ایف)کی جون 2025 کی رپورٹ کے مطابق پاکستان کے سرکاری ادارے نیشنل ڈویلپمنٹ کمپلیکس (این ڈی سی)پر میزائل ڈیولپمنٹ کے لیے ممنوعہ اشیا کی خفیہ درآمد کا الزام ہے۔ یہ ایف اے ٹی ایف کے قوانین اور عالمی پابندیوں کی کھلی خلاف ورزی ہے۔
پاکستان کا ردعمل
پاکستان بینک ایسوسی ایشن کے صدر ظفر مسعود نے رائٹرز کو بتایا کہ منی لانڈرنگ اور دہشت گردوں کی مالی معاونت سے نمٹنے کے لیے پاکستان کے قوانین "انتہائی سخت اور موثر" ہیں۔ پاکستان کی وزارت خارجہ نے اس معاملے پر کوئی تبصرہ نہیں کیا۔ پاکستان کے علاوہ آر بی آئی نے بھی خط میں شمالی کوریا کو ہائی رسک ایریا قرار دیا ہے۔ اس میں اقوام متحدہ کی سلامتی کونسل کی جانب سے شمالی کوریا پر عائد پابندیوں کا بھی حوالہ دیا گیا۔