نئی دہلی:کانگریس کے سابق صدر اور لوک سبھا میں قائد حزب اختلاف راہل گاندھی نے وزیر اعظم نریندر مودی پر سخت حملہ کرتے ہوئے کہا کہ ووٹ چوری ان کے سوچے سمجھے منصوبے کا حصہ ہے، اس لیے وہ من مانی کرتے ہیں جبکہ چیف الیکشن کمشنر اور قائد حزب اختلاف کی تقرری کے دوران ان کی کوئی شنوائی نہیں ہوتی مسٹر گاندھی نے کہاکہ "وزیراعظم فیصلہ کرتے ہیں کہ الیکشن کمشنر کون بنے گا۔ وہاں اپوزیشن لیڈر کی بات بالکل نہیں سنی جاتی۔ سال 2023 میں بی جے پی نے نیا قانون بنایا کہ الیکشن کمشنر کے خلاف کوئی مقدمہ درج نہیں کیا جا سکتا۔ اس قانون پر سوال اٹھاتے ہوئے انہوں نے کہا کہ ایسا قانون کیوں بنایا گیا؟ انہوں نے کہا کہ اس کا سیدھا جواب یہ ہے کہ یہ 'ووٹ چوری' کروانے کے لیے کیا جاتا ہے۔
انہوں نے کہاکہ "نریندر مودی اور امیت شاہ نے 'ووٹ چوری' سے متعلق میری پریس کانفرنس میں کچھ نہیں کہا۔ اس کی وجہ یہ ہے کہ جب کوئی چور پکڑا جاتا ہے تو وہ بالکل خاموش ہو جاتا ہے۔ اس سے پتہ چلتا ہے کہ میں پھنس گیا ہوں، میں اب پکڑا گیا ہوں۔