انٹرنیشنل ڈیسک: وینزویلا میں امریکی فوجی حملوں اور صدر نکولس مادورو اور ان کی اہلیہ سیلیا فلوریس کی گرفتاری کے بعد  ہندوستان  نے سخت ردعمل ظاہر کرتے ہوئے اسے شدید تشویش کا معاملہ قرار دیا ہے۔   حکومت ہند نے کہا ہے کہ وہ وینزویلا میں تیزی سے بدلتے حالات پر گہری نظر رکھے ہوئے ہے۔  ہندوستان  کا یہ بیان ایسے وقت سامنے آیا ہے جب امریکی خصوصی دستوں نے اتوار علی الصبح وینزویلا کے دارالحکومت کاراکاس میں ایک منظم رات کے فضائی آپریشن کے تحت صدر مادورو اور ان کی اہلیہ کو حراست میں لے لیا۔ اس کارروائی نے بین الاقوامی سطح پر سیاسی اور سفارتی ہلچل تیز کر دی ہے۔
وزارت خارجہ کے ذرائع کے مطابق  ہندوستان  نے واضح کیا ہے کہ کسی بھی ملک میں سیاسی بحران کا حل فوجی مداخلت سے نہیں بلکہ بات چیت اور پرامن طریقوں سے ہونا چاہیے۔ ہندوستان  نے تمام فریقوں سے ضبط و تحمل اختیار کرنے اور ایسے اقدامات سے گریز کرنے کی اپیل کی ہے جن سے حالات مزید خراب ہوں۔  ہندوستان نے یہ بھی دوہرایا کہ وہ بین الاقوامی قانون، ممالک کی خودمختاری اور اندرونی معاملات میں عدم مداخلت کے اصولوں کی حمایت کرتا ہے۔
نئی دہلی کا ماننا ہے کہ وینزویلا کی موجودہ صورتحال کا حل صرف بات چیت اور سفارتی کوششوں کے ذریعے ہی نکل سکتا ہے۔ قابل ذکر ہے کہ امریکی کارروائی کے بعد دنیا کے کئی ممالک میں ردعمل سامنے آئے ہیں۔ کچھ ممالک نے اس اقدام کی حمایت کی ہے جبکہ  ہندوستان ، چلی اور روس جیسے ممالک نے اسے تشویشناک قرار دیتے ہوئے امن اور مکالمے پر زور دیا ہے۔