نیشنل ڈیسک: یوم آزادی کے موقع پر لال قلعہ سے ملک سے خطاب کرتے ہوئے وزیر اعظم نریندر مودی نے واضح پیغام دیا کہ ہندوستان  اپنے کسانوں، ماہی گیروں اور مویشی پالنے والے  کسانوں کے مفادات پر کسی بھی صورت میں سمجھوتہ نہیں کرے گا۔ انہوں نے کسی ملک یا رہنما کا نام لیے بغیر اشارہ دیا کہ مجوزہ دو طرفہ تجارتی معاہدے (بی ٹی اے)میں زراعت اور ڈیری سیکٹر میں ڈیوٹی کم کرنے کا امریکی مطالبہ قبول نہیں کیا جائے گا، کیونکہ اس سے ملک کے کسانوں کو براہ راست نقصان پہنچے گا۔
وزیر اعظم نے کہا کہ کسانوں کی محنت نے ہندوستان کی ترقی میں بہت اہم کردار ادا کیا ہے۔ گزشتہ سال ملک نے اناج کی پیداوار میں نیا ریکارڈ قائم کیا ہے۔ ان کا کہنا تھا کہ 'زمین وہی تھی، لیکن پانی اور سہولیات کی دستیابی سے پیداوار میں بھی اضافہ ہوا۔' مچھلی کی پیداوار میں ہندوستان دنیا میں دوسرے نمبر پر پہنچ گیا ہے، جب کہ ہم چاول، سبزیوں اور دیگر زرعی مصنوعات میں بھی دوسرے نمبر پر ہیں۔
مودی نے یہ بھی کہا کہ ہندوستان کی زرعی مصنوعات اب پوری دنیا میں اپنی شناخت بنا رہی ہیں۔ تقریبا 4 لاکھ کروڑ روپے کی زرعی مصنوعات بیرون ملک بھیجی گئی ہیں۔ ملک کے ایک سو ایسے اضلاع، جو ترقی کی دوڑ میں پیچھے ہیں، کو پی ایم دھن دھانیہ کسان یوجنا کے تحت خصوصی مدد دی جا رہی ہے۔
ڈونالڈ ٹرمپ کو مودی کی دو ٹوک جواب
انہوں نے دوہرایا کہ 'مودی ہندوستان کے کسانوں، ماہی گیروں اور مویشی پالنے والوں کے خلاف کسی بھی قسم کی نقصان دہ پالیسی کے خلاف دیوار کی طرح کھڑے ہیں۔ ہندوستان  کسانوں، مویشی پالنے والوں اور ماہی گیروں کے حوالے سے کسی بھی ناخوشگوار معاہدے کو کبھی قبول نہیں کرے گا۔'
یہ بیان ایسے وقت میں سامنے آیا ہے جب امریکہ مجوزہ تجارتی معاہدے میں مکئی، سویا بین، سیب، بادام اور ایتھنول جیسی مصنوعات پر ڈیوٹی کم کرنے کے ساتھ ہی ہندوستانی بازار میں امریکی ڈیری مصنوعات کی رسائی بڑھانے کا مطالبہ کر رہا ہے۔ ہندوستان نے ان مطالبات کی سختی سے مخالفت کی ہے، کیونکہ اس سے کسانوں کی روزی روٹی کو براہ راست متاثر ہوسکتی ہے ۔