بیجنگ: چین نے پیر کو کہا کہ ہندوستان کے ساتھ سرحدی تنازعہ پیچیدہ ہے اور اسے حل کرنے میں وقت لگے گا لیکن اس نے سرحدوں کی حد بندی پر بات چیت کرنے اور پرامن صورتحال کو برقرار رکھنے  کی خواہش کا اظہار کیا ہے ۔
وزیر دفاع راج ناتھ سنگھ نے 26 جون کو چنگ ڈاؤ  میں اپنے چینی ہم منصب ڈونگ جون کے ساتھ ملاقات میں تجویز پیش کی تھی کہ ہندوستان اور چین کو سرحد پر کشیدگی کو کم کرنے اور سرحدوں کی حد بندی کے موجودہ نظام کو بحال کرنے کے لیے ایک قائم فریم ورک کے تحت "پیچیدہ مسائل" کو حل کرنا چاہیے۔ سنگھ اور دونگ نے چنگ ڈا ؤ میں شنگھائی تعاون تنظیم (SCO) سربراہی اجلاس کے موقع پر دو طرفہ بات چیت کی، جس میں لائن آف ایکچوئل کنٹرول (LAC) پر امن اور استحکام کو برقرار رکھنے پر توجہ مرکوز کی گئی۔
 سنگھ کے ریمارکس  کو لیکر چین کے رد عمل کے بارے میں پوچھا گیا تو وزارت خارجہ کے ترجمان ماؤ ننگ نے کہا کہ میں آپ کو بتا سکتا ہوں کہ چین اور ہندوستان نے سرحدی مسائل پر ایک خصوصی نمائندہ میکانزم قائم کیا ہے اور چین ہندوستان  سرحدی مسائل کو حل کرنے کے لیے سیاسی پیرامیٹرز اور رہنما اصولوں پر اتفاق کیا ہے۔انہوں نے کہا کہ دونوں فریقوں کے درمیان مختلف سطحوں پر سفارتی اور فوجی مواصلاتی طریقہ کار موجود ہے۔
ننگ نے کہا کہ چین سرحد کی حد بندی اور سرحدی انتظام سمیت مسائل پر ہندوستان کے ساتھ بات چیت کو برقرار رکھنے، سرحدی علاقوں میں امن و استحکام برقرار رکھنے اور سرحد پار تبادلے اور تعاون کو فروغ دینے کے لیے تیار ہے۔خصوصی نمائندوں کی سطح کی بات چیت کے 23 دوروں کے باوجود سرحدی مسئلے کے حل میں ہو رہی تاخیر کے بارے میں پوچھے جانے پر، ننگ نے کہا کہ  سرحد کا معاملہ پیچیدہ ہے اور اسے حل کرنے میں وقت لگتا ہے۔
انہوں نے کہا کہ مثبت پہلو یہ ہے کہ دونوں ممالک نے پہلے ہی گہرائی سے بات چیت کے لیے مختلف سطحوں پر میکانزم قائم کر رکھا ہے۔ ہمیں امید ہے کہ ہندوستان اس سمت میں چین کے ساتھ مل کر کام کرے گا، متعلقہ مسائل پر بات چیت جاری رکھے گا اور سرحدی علاقوں میں امن و استحکام کو برقرار رکھے گا۔ گزشتہ سال دسمبر میں قومی سلامتی کے مشیر (NSA) اجیت ڈوبھال اور چینی وزیر خارجہ وانگ یی کے درمیان خصوصی نمائندوں کے طور پر 23 ویں میٹنگ ہوئی تھی۔ 2020 میں ہندوستان  چین سرحدی علاقوں کے مغربی سیکٹر میں جھڑپ کے بعد خصوصی نمائندوں کی یہ پہلی میٹنگ تھی۔
ہندوستان کے جاری کردہ ایک بیان کے مطابق، ڈونگ کے ساتھ اپنی ملاقات میں، سنگھ نے بہترین باہمی فائدے کے لیے "اچھی ہمسائیگی کی شرائط" قائم کرنے کی ضرورت پر زور دیا اور مشرقی لداخ میں 2020 کے تعطل کے نتیجے میں پیدا ہونے والے "اعتماد کے خسارے" کو پورا کرنے کے لیے "زمینی سطح پر کارروائی" کرنے پر زور دیا۔ سنگھ اور ڈونگ کے درمیان یہ ملاقات نئی دہلی اور بیجنگ کے درمیان تعلقات کو بحال کرنے کی کوششوں کے درمیان ہوئی جب گزشتہ سال اکتوبر میں ہندوستان اور چین نے مشرقی لداخ میں LAC پر فوجی تعطل کو ختم کرنے پر اتفاق کیا تھا۔