انٹرنیشنل ڈیسک: روس اور یوکرین کی جنگ کے خاتمے کے لیے جاری سفارتی کوششوں کے دوران ایک بڑا تناؤ  پیدا ہو گیا ہے۔ روس کے وزیر خارجہ سرگئی لاوروف نے الزام عائد کیا ہے کہ یوکرین نے شمالی روس ( نووگوروڈ) کے علاقے میں واقع صدر ولادیمیر پوتن کی رہائش گاہ پر 91  طویل فاصلے تک مار کرنے والے ڈرونز سے حملہ کرنے کی کوشش کی۔ روس کا دعوی ہے کہ اس کے فضائی دفاعی نظام نے تمام ڈرونز کو مار گرایا اور صدر پوتن محفوظ ہیں۔
ٹرمپ نے حملے پر شدید ناراضگی ظاہر کی
امریکی صدر ڈونالڈ ٹرمپ نے اس خبر پر سخت ناراضگی کا اظہار کیا ہے۔ فلوریڈا میں اسرائیلی وزیر اعظم نیتن یاہو سے ملاقات سے قبل ٹرمپ نے بتایا کہ صدر پوتن نے خود مجھے فون کر کے اس حملے کی اطلاع دی۔ میں اس پر بہت ناراض ہوں۔ کسی رہنما کے گھر کو نشانہ بنانا قابل قبول نہیں ہے۔ تاہم ٹرمپ نے یہ بھی کہا کہ یہ ممکن ہے کہ یہ حملہ ہوا ہی نہ ہو لیکن ہم اس کی حقیقت کا پتہ لگائیں گے۔
یوکرین نے کہا یہ محض من گھڑت کہانی ہے
یوکرین کے صدر وولادیمیر زیلنسکی نے ان الزامات کو مکمل طور پر مسترد کرتے ہوئے انہیں روسی جھوٹ قرار دیا ہے۔ زیلنسکی کا کہنا ہے کہ روس یہ ڈراما اس لیے کر رہا ہے تاکہ وہ یوکرین کی سرکاری عمارتوں پر بڑے حملے کرنے کا بہانہ بنا سکے اور امن مذاکرات کو پٹڑی سے اتار سکے۔
امن کی راہ میں نئی رکاوٹیں
کریملن نے خبردار کیا ہے کہ اس مبینہ حملے کے بعد وہ امن معاہدے کے لیے اپنی شرائط پر نظر ثانی کریں گے۔ دوسری جانب صدر پوتن نے اپنے فوجی کمانڈروں کو ہدایت دی ہے کہ وہ یوکرین کے زاپوریزیا( Zaporizhzhia)  اور ڈونباس  (Donbas) علاقوں پر مکمل کنٹرول حاصل کرنے کے لیے حملوں میں تیزی لائیں۔