نیشنل ڈیسک: جب دنیا کے زیادہ تر ممالک ابھی گھڑی کی سوئیوں پر بارہ بجنے کا انتظار کر رہے تھے، اسی وقت بحرالکاہل کے وسط میں واقع کچھ دور دراز علاقوں میں نئے سال 2026 کا جشن شروع ہو گیا۔  ہندوستان  سے تقریبا 9 گھنٹے پہلے ہی ان جزیروں میں نئے سال کی آمد ہو چکی تھی۔
دنیا میں سب سے پہلے نیا سال کریتیماتی ( کریسمس ) جزیرے میں
سب سے پہلے نیا سال کریباتی کے چھوٹے سے جزیرے  کریتیماتی  (کریسمس ) جزیرے میں پہنچا۔ آدھی رات ہوتے ہی یہاں لوگوں نے جشن منانا شروع کر دیا۔ اس کے بعد کچھ ہی دیر میں نیوزی لینڈ کے چیٹم جزائر میں بھی نئے سال کا استقبال کیا گیا۔
کریباتی کہاں واقع ہے؟
کریباتی بحرالکاہل میں واقع ایک جزیرہ نما ملک ہے، جو ہوائی کے جنوب اور آسٹریلیا کے شمال مشرق میں واقع ہے۔ یہ ملک 33 چھوٹے بڑے ایٹولز ( کورل سے بنے جزیرے ) پر مشتمل ہے  اور تقریبا چار ہزار کلومیٹر کے علاقے میں پھیلا ہوا ہے ۔ کریباتی نے 1979 میں برطانیہ سے آزادی حاصل کی اور اس کی آبادی تقریبا ایک لاکھ16 ہزار ہے۔ اگرچہ یہ ملک جغرافیائی طور پر ہوائی کے قریب ہے، لیکن 1994 میں ٹائم زون میں تبدیلی کے بعد کریباتی دنیا کے باقی حصوں سے ایک دن پہلے نیا سال مناتا ہے۔ اسی وجہ سے کریتیماتی ( کریسمس ) جزیرے کو دنیا میں سب سے پہلے نیا سال منانے والا مقام کہا جاتا ہے۔
سمندر سے گھرا ہوا لیکن خطرے میں
کریباتی کے کئی جزائر سمندر کی سطح میں اضافے کی وجہ سے خطرے میں ہیں۔ اس کے باوجود یہاں نئے سال کا استقبال پورے جوش و خروش کے ساتھ کیا جاتا ہے۔ یہ جزیرہ جنوبی بحرالکاہل کے سب سے بڑے سمندری محفوظ علاقے کے طور پر بھی جانا جاتا ہے۔
نیوزی لینڈ میں بھی جلد نیا سال
کریباتی کے بعد نیوزی لینڈ کے چیٹم جزائر میں نیا سال 2026 پہنچا۔ یہاں تقریباً  چھ سو افراد رہتے ہیں۔ ہوٹل چیٹم کے بار میں مقامی لوگ 2025 کے آخری لمحات ایک ساتھ گزار رہے تھے۔ ہوٹل کی مالکن ٹونی کرون کے مطابق نوجوان دیر تک جاگیں گے جبکہ بزرگ ممکن ہے پہلے ہی سو جائیں۔ ٹونی کا کہنا ہے کہ یہ جگہ لوگوں کے دلوں میں خاص وابستگی رکھتی ہے۔ یہاں 2026 کا استقبال اس لیے بھی خاص ہے کہ دنیا سے کٹے ہونے کے باوجود یہ لوگوں کو ایک دوسرے سے جوڑتا ہے۔