ویلنگٹن: جنوبی بحرالکاہل میں واقع جزیرہ ملک وانواتو میں پیر کے روز زلزلے کے شدید جھٹکے محسوس کیے گئے۔ حکام کے مطابق اس زلزلے کی شدت ریکٹر پیمانے پر 7.3 ریکارڈ کی گئی۔ اس شدید زلزلے کے باعث لوگوں میں خوف و ہراس پایا جا رہا ہے۔

امریکی ارضیاتی سروے کے مطابق زلزلے کا مرکز زمین کے اندر تقریباً 115 کلومیٹر گہرائی میں تھا۔ یہ جھٹکے وانواتو کے شہر لوگن وِل سے تقریباً 35 کلومیٹر شمال مشرق میں محسوس کیے گئے۔
اطمینان کی بات یہ ہے کہ اس شدید زلزلے کے باوجود فی الحال کسی جانی یا مالی نقصان کی فوری اطلاع سامنے نہیں آئی۔ ماہرین کے مطابق کم گہرائی میں آنے والے زلزلے زیادہ خطرناک ہوتے ہیں جبکہ یہ زلزلہ کافی گہرائی میں آیا۔ امریکی سونامی انتباہی مرکز نے واضح کیا ہے کہ اس زلزلے کے بعد سونامی کا کوئی خطرہ نہیں ہے اور نہ ہی کوئی انتباہ یا ہدایت جاری کی گئی ہے۔