حیدرآباد: شہریت ترمیمی قانون  پر ملک گیر احتجاجی مظاہروں کے درمیان اردو مصنف مجتبیٰ حسین نے اپنا پدم شری ایوارڈ لوٹانے کا فیصلہ کیا ہے ۔ انہوں نے کہا کہ وہ ملک کے موجودہ حالات سے خوش نہیں ہیں۔حسین نے الزام لگایا کہ مجرمانہ سرگرمیاں دن بدن بڑھتی جا رہی ہیں اور جمہوریت خطرے میں ہے ملک میں خوف وہراس کا ماحول ہے ۔

انہوں نے بدھ کو کہا، 'گاندھی جی، جواہر لال نہرو، سردار پٹیل، مولانا ابوالکلام آزاد اور ڈاکٹر بھیم راؤ امبیڈکر نے جو جمہوری تانا بانا بنا تھا، اس کو توڑا جا رہا ہے۔حسین نے کہا کہ کئی لوگوں کی آواز دبائی جا رہی ہے، کئی کو مارا جا رہا ہے اور غریب لوگ ہنسنے کی پوزیشن میں نہیں ہیں۔حسین کو 2007 میں اردو ادب کے فروغ میں تعاون کے لئے پدم شری سے نوازا گیا تھا۔تاہم، انہوں نے کہا کہ وہ ملک کے ان حالات کے لئے بی جے پی کو ذمہ دار نہیں ٹھہرائیں گے۔سیاست کی سطح ہی گر گئی ہے۔ 87 سالہ مصنف نے کہا، 'پہلے لیڈر سیاستدان ہوتے تھے۔اب ایسا نہیں۔

ایوارڈ لوٹانے کی وجہ پوچھے جانے پر انہوں نے کہا، 'میں آج کے حالات سے خوش نہیں ہوں۔ انہوں نے کہا کہ  شہری کے طور پر میں ملک میں خوش نہیں ہوں،بھیڑ لوگوں کو قتل کر رہی ہے، عصمت دری کے واقعات  ہو رہے ہیں، مجرمانہ سرگرمیاں ہر روز بڑھ رہی ہیں۔