انٹرنیشنل ڈیسک: اقوام متحدہ نے انسانیت کے خلاف جرائم کے الزامات میں بنگلہ دیش کی معزول وزیر اعظم شیخ حسینہ کے خلاف فیصلے کو متاثرین کے لیے ایک "اہم لمحہ" قرار دیا، لیکن سزائے موت دیے جانے پر افسوس بھی ظاہر کیا۔ اقوام متحدہ کے سربراہ انتونیو گٹیرس کے ترجمان سٹیفن دوجارک نے پیر کو یہاں روزانہ پریس کانفرنس میں کہا کہ گٹیرس اقوام متحدہ کے انسانی حقوق کے ہائی کمشنر وولکر ترک کے اس موقف سے مکمل طور پر متفق ہیں کہ ہم کسی بھی صورت میں سزائے موت کے استعمال کے خلاف ہیں۔دوجارک بنگلہ دیشی عدالت کی جانب سے حسینہ کو ان کی غیر موجودگی میں موت کی سزا سنائے جانے پر سیکریٹری جنرل کے ردعمل سے متعلق ایک سوال کا جواب دے رہے تھے۔
بنگلہ دیش کے بین الاقوامی جرائم ٹریبونل نے پیر کو حسینہ کو گزشتہ سال جولائی میں ان کی حکومت کے خلاف وسیع احتجاج کے دوران کیے گئے انسانیت کے خلاف جرائم کا مجرم پایا۔ گزشتہ سال پانچ اگست کو بنگلہ دیش میں اپنی حکومت گرنے کے بعد سے ہندوستان میں مقیم حسینہ (78) کو ٹریبونل نے  گزشتہ روز  17 اکتوبر 2025  کو ان کی غیر موجودگی میں موت کی سزا سنائی ہے۔ حسینہ کے ساتھی اور سابق وزیر داخلہ اسداالزماں خان کمال کو بھی اسی نوعیت کے الزامات میں موت کی سزا دی گئی ہے۔
جنیوا میں اقوام متحدہ کے انسانی حقوق کے ترجمان روینا شمداسانی نے ایک بیان میں کہا کہ حسینہ اور سابق وزیر داخلہ کے خلاف ٹریبونل کے فیصلے کا اعلان' گزشتہ سال احتجاجی مظاہروں کے دوران کیے گئے سنگین حقوق کی خلاف ورزیوں کے متاثرین کے لیے ایک اہم لمحہ ہے '۔ انہوں نے کہا کہ ہمیں سزائے موت نافذ کیے جانے پر بھی افسوس ہے، جس کی ہم ہر حالت میں مخالفت کرتے ہیں۔