لندن: ایران جنگ کے باعث بند ہونے والی آبنائے ہرمز کو دوبارہ کھولنے کے لیے اب عالمی سطح پر بڑی کوشش شروع ہو گئی ہے۔ برطانیہ نے اس معاملے پر35 ممالک کی ایک اہم میٹنگ بلائی ہے جس میں بھارت کو بھی شامل ہونے کی دعوت دی گئی ہے۔ برطانوی وزیر اعظم کیئر اسٹارمر کی اس پہل میں بھارت کی جانب سے خارجہ سیکریٹری وکرم مسری آن لائن شریک ہو رہے ہیں۔ وزارت خارجہ کے ترجمان رندھیر جیسوال نے اس کی تصدیق کی ہے۔
یہ اجلاس ایسے وقت میں ہو رہا ہے جب ایران جنگ کے سبب دنیا کے سب سے اہم تیل راستوں میں سے ایک تقریباً بند ہو چکا ہے۔ اس سے بھارت چین جاپان ملائیشیا اور انڈونیشیا جیسے ممالک میں پٹرول ڈیزل اور گیس کی فراہمی متاثر ہوئی ہے۔ کئی جہاز اس راستے میں پھنسے ہوئے ہیں۔ برطانیہ کی وزیر خارجہ ایویٹ کوپر اس اجلاس کی قیادت کر رہی ہیں جہاں پہلے مرحلے میں سفارتی اور سیاسی حل پر بات ہو رہی ہے تاکہ بغیر جنگ کے راستہ کھولا جا سکے۔ بھارت بھی اس معاملے پر سرگرم ہے اور مسلسل ایران اور دوسرے ممالک سے رابطے میں ہے۔
جیسوال کے مطابق حالیہ بات چیت کے بعد6 بھارتی جہاز بحفاظت آبنائے ہرمز عبور کر چکے ہیں اور باقی جہازوں کی حفاظت کے لیے کوششیں جاری ہیں۔ اس دوران امریکی صدر ڈونالڈ ٹرمپ بار بار کہہ چکے ہیں کہ جن ممالک کی تجارت اس راستے سے ہوتی ہے انہیں اسے کھلوانے کی ذمہ داری لینی چاہیے۔ انہوں نے نیٹو اور برطانیہ پر بھی دباو ڈالا لیکن برطانیہ نے فوجی کارروائی سے دور رہتے ہوئے سفارتی راستہ اختیار کیا ہے۔ مجموعی طور پر آبنائے ہرمز کا بحران اب عالمی معاشی اور تزویراتی تشویش بن چکا ہے اور اسے حل کرنے کے لیے دنیا کے بڑے ممالک متحد ہونے کی کوشش کر رہے ہیں۔