دبئی: متحدہ عرب امارات (یو اے ای)کی حکومت نے تمام ان میڈیا رپورٹس اور سوشل میڈیا پوسٹس کو واضح طور پر مسترد کردیا ہے جس میں دعوی کیا گیا تھا کہ ہندوستانی شہریوں کو 'لائف ٹائم گولڈن ویزا' دیا جا رہا ہے۔ متحدہ عرب امارات کی وفاقی اتھارٹی برائے شناخت، شہریت، کسٹمز اور پورٹ سکیورٹی (آئی سی پی) نے واضح طور پر کہا ہے کہ' کچھ قومیتوں کو تاحیات گولڈن ویزا دینے کا کوئی بندوبست نہیں ہے' اور ایسی خبریں سراسر غلط اور افواہوں پر مبنی ہیں۔
گولڈن ویزا کیا ہے؟
گولڈن ویزا متحدہ عرب امارات کی طرف سے جاری کردہ ایک خصوصی رہائشی ویزا ہے، جو عام طور پر 5 یا 10 سال کے لیے دیا جاتا ہے۔ یہ ویزا بنیادی طور پر سرمایہ کاروں، سائنسدانوں، ڈاکٹروں، کاروباری افراد اور نمایاں طلبا ء کو دیا جاتا ہے تاکہ وہ طویل عرصے تک متحدہ عرب امارات میں رہ کر اپنا حصہ ڈال سکیں۔
افواہوں کی حقیقت
حالیہ دنوں میں، سوشل میڈیا اور کچھ ویب سائٹس پر یہ دعوی کیا جا رہا تھا کہ متحدہ عرب امارات نے ہندوستانی شہریوں کے لیے "لائف ٹائم گولڈن ویزا" اسکیم شروع کی ہے۔ بہت سے لوگوں نے اسے شیئر کیا اور ویزا سروس فراہم کرنے والوں نے بھی اس پر پیکجز بیچنا شروع کر دیا۔ اس پر وضاحت جاری کرتے ہوئے شناخت، شہریت، کسٹمز اور پورٹ سکیورٹی (ICP) نے کہا کہ "متحدہ عرب امارات میں کسی مخصوص قومیت کے لیے 'لائف ٹائم' ویزا کی کوئی پالیسی نہیں ہے۔ گولڈن ویزے مقررہ مدت کے لیے ان افراد کو جاری کیے جاتے ہیں جو مخصوص معیارات کے تحت اہلیت پر پورا اترتے ہیں۔
ہندوستانیوں کے لیے موجودہ فوائد کیا ہیں؟
لاکھوں ہندوستانی متحدہ عرب امارات میں کام کر رہے ہیں اور وہاں کی معیشت میں اہم کردار ادا کر رہے ہیں۔ ایسے میں، ہندوستانی شہریوں کو 10 سال تک کا گولڈن ویزا مل جاتا ہے، لیکن یہ "لائف ٹائم" نہیں ہوتا اور اسے وقتا فوقتا تجدید کروانا پڑتا ہے۔ متحدہ عرب امارات کی حکومت نے عوام سے اپیل کی ہے کہ وہ ایسی گمراہ کن اور غیر سرکاری معلومات پر یقین نہ کریں۔ اس کے علاوہ، ویزا سے متعلق کسی بھی معلومات کے لیے، صرف سرکاری ویب سائٹ یا متحدہ عرب امارات کے سفارت خانے سے رابطہ کریں۔