واشنگٹن: امریکہ کے صدر ڈونالڈ ٹرمپ نے دیوالی پر مبارکباد دیتے ہوئے اس تہوار کو 'اندھیرے پر روشنی کی جیت ' کی لازوال مثال بتایا۔ ٹرمپ نے پیر کو ایک بیان میں کہا کہ آج، میں 'روشنی کے تہوار' دیوالی منا رہے ہر امریکی کو مبارکباد دیتا ہوں۔ امریکہ کے صدر نے کہا کہ کئی امریکیوں کے لیے دیوالی، اندھیرے پر روشنی کی جیت  کی ایک لازوال مثال ہے۔ یہ کمیونٹی کو جشن منانے، امید سے طاقت حاصل کرنے اور نئی چیزوں کو پورے جوش سے اپنانے اور خاندانوں اور دوستوں کو ایک ساتھ لانے کا بھی وقت ہے۔ انہوں نے کہا کہ کھوں شہری دیے جلاتے ہیں اور ہم اس لازوال سچائی میں خوش ہوتے ہیں کہ بھلائی ہمیشہ برائی پر فتح پاتی ہے۔
دیوالی منانے والے ہر امریکی کے لیے، خدا کرے کہ یہ تہوار خوشحالی، امید اور امن لے کر آئے۔ وزیر خارجہ مارکو روبیو نے بھی لوگوں کو دیوالی کی دلی مبارکباد دی۔ انہوں نے ایک بیان میں کہا کہ  وزارت خارجہ کی طرف سے میں امریکہ اور دنیا بھر کے ان تمام کمیونٹیوں کو دل کی گہرائیوں سے مبارکباد دیتا ہوں، جو روشنی کا تہوار دیوالی منا رہے ہیں۔ وفاقی تحقیقاتی بیورو (ایف بی آئی)کے ڈائریکٹر کاش پٹیل اور ریپبلکن پارٹی کے رہنما اور اوہائیو کے گورنر کے امیدوار ویوک راماسوامی سمیت کئی اہم بھارتی-امریکیوں نے پیر کو دیوالی پر مبارکباد دی۔ پٹیل نے 'ایکس' پر ایک پوسٹ میں کہا کہ دیوالی کی مبارکباد۔ دنیا بھر میں روشنی کے تہوار کا جشن منایا جا رہا ہے، جو برائی پر بھلائی کی فتح کی علامت ہے۔
وہ اس سال کے آغاز میں وفاقی تحقیقاتی بیورو (ایف بی آئی)کی قیادت کرنے والے پہلے بھارتی-امریکی بنے۔ راماسوامی نے سوشل میڈیا پوسٹ میں کہا کہ دیپاولی کی مبارکباد! اندھیرے پر روشنی کی جیت ہو۔نیویارک شہر کے میئر کے عہدے کے امیدوار اور فلم ساز میرا نائر کے بیٹے جوہران ممدانی نے بھی 'ایکس' پر دیوالی کی مبارکباد دی۔ انہوں نے کہا کہ شب دیوالی مبارک ہو! سب کو دیوالی کی دلی مبارکباد۔ ہمارے شہر بھر میں، خاندان دیے جلا کر اندھیرے پر روشنی اور مایوسی پر امید کی فتح کا جشن منا رہے ہیں۔
آج رات نیویارک ان لوگوں کی وجہ سے زیادہ چمک رہا ہے جو اپنی روشنی اور روایات کو سنبھال کر یہاں آئے ہیں۔ اس کے علاوہ، ٹیکساس کے گورنر گریگ ایبٹ نے 'گورنر میشن' میں دیوالی کی تقریب کا انعقاد کیا۔ اس کا انعقاد ہر سال ہوتا ہے، جہاں اس تہوار کو منانے کے لیے بھارتی-امریکی کمیونٹی ایک ساتھ آتی ہے۔ اتوار کی تقریب میں ہیوسٹن میں  ہندوستان  کے سفیر ڈی سی منجوناتھ، بھارتی-امریکی کمیونٹی کے اہم اراکین اور منتخب عہدیدار شامل ہوئے۔