نیشنل ڈیسک:  ہندوستان سمیت سات ملک دنیا کی  'شہری آبادی ' کے مستقبل کی ترقی کو تشکیل دیں گے کیونکہ  2025 سے2050 کے درمیان ان ملکوں میں پچاس کروڑ سے زیادہ شہری باشندوں کے بڑھنے کی امید ہے۔ اقوام متحدہ نے یہ بات کہی۔ اقوام متحدہ کے اقتصادی اور سماجی امور کے شعبے (یو این ڈی ای ایس اے)کی جانب سے جاری  'عالمی شہری کاری امکانات 2025 :  نتائج کا خلاصہ '  میں کہا گیا ہے کہ دنیا تیزی سے شہری ہوتی جا رہی ہے، اور اب آٹھ اعشاریہ دو ارب کی عالمی آبادی کا 45 فیصد حصہ شہروں میں رہتا ہے۔
رپورٹ میں کہا گیا ہے کہ موجودہ وقت سے 2050 کے درمیان دنیا کی شہری آبادی کی بڑھوتری سات ملکوں میں مرکوز ہوگی جن میں  ہندوستان ، نائیجیریا، پاکستان، کانگو جمہوریہ، مصر، بنگلہ دیش اور ایتھوپیا شامل ہیں۔
یہ سات ملک، جہاں 2050 میں عالمی آبادی کے تقریبا ایک تہائی(تیس فیصد)لوگ رہ رہے ہوں گے ، شہری آبادی کے مستقبل کی ترقی کو تشکیل دیں گے اور اندازہ ہے کہ  2050 تک شہری باشندوں کی عالمی بڑھوتری میں ان کا حصہ آدھے سے زیادہ ہوگا۔ رپورٹ کے مطابق، ان سات ملکوں میں مجموعی طور پر 2025  اور 2050 کے درمیان پچاس کروڑ سے زیادہ شہری باشندوں کے بڑھنے کی امید ہے، جو اس مدت کے دوران شہری باشندوں کی عالمی تعداد میں اندازاً 98.6 کروڑ کی بڑھوتری کے آدھے سے زیادہ کے برابر ہوگا۔
رپورٹ میں کہا گیا ہے کہ ان اہم ملکوں میں شہری کاری کی کامیابی یا ناکامی عالمی ترقی کے نتائج کو تشکیل دے گی۔ شہری ترقی کو پائیدار طور پر سنبھالنے کی ان کی صلاحیت کا نہ صرف ان کی آبادی پر بلکہ پائیدار ترقی کے اہداف اور آب و ہوا کے مقاصد کی سمت عالمی پیش رفت پر بھی گہرا اثر پڑے گا۔
اس میں کہا گیا ہے کہ دو سب سے زیادہ آبادی والے ملکوں  ہندوستان اور چین میں ابھی سے لے کر  2050  تک شہروں میں رہنے والی سب سے بڑی آبادی بھی ہوگی۔ 2025 تک  ہندوستان  میں شہروں میں رہنے والے لوگوں کا تناسب  44  فیصد اور چین میں40 فیصد تک پہنچ گیا ہے۔