واشنگٹن: امریکہ کے سابق صدر جان ایف ، کینیڈی کی 34 پوتی   تاتیانا شلوسبرگ نے ایک جذباتی مضمون کے ذریعے بتایا کہ انہیں مہلک اسٹیج کا کینسر ہے۔ انہوں نے بتایا کہ ڈاکٹروں نے انہیں خبردار کیا ہے کہ وہ شاید انہیں صرف ایک سال تک زندہ رکھ سکیں۔ تاتیانا نے بتایا کہ مئی 2024 میں اپنے دوسرے بچے کی پیدائش کے بعد جب ان کی میڈیکل رپورٹ کی جانچ کی گئی تو ڈاکٹروں نے ان کے سفید خون کے خلیوں کی تعداد غیر معمولی پائی۔ آگے کی جانچ میں معلوم ہوا کہ انہیں ایکیوٹ مائیلائیڈ لیوکیمیا ہے، وہ بھی ایک نایاب تبدیلی کے ساتھ جو عام طور پر عمر رسیدہ افراد میں پائی جاتی ہے۔
انہوں نے بتایا کہ وہ مسلسل علاج کرا رہی ہیں جس میں کئی مرحلوں کی کیموتھراپی، دو بار اسٹیم سیل ٹرانسپلانٹ (ایک بار بہن سے، دوسری بار نامعلوم ڈونر سے)اور کئی طبی تجربات شامل ہیں۔ لیکن ایک حالیہ تجربے میں ڈاکٹر نے کہا کہ وہ شاید انہیں صرف ایک سال تک ہی زندہ رکھ پائیں۔ اپنے مضمون میں تاتیانا نے اپنے چچازاد بھائی اور امریکہ کے وزیر برائے صحت و انسانی خدمات رابرٹ ایف کینیڈی جونیئر پر بھی تنقید کی۔ انہوں نے کہا کہ رابرٹ ایف کینیڈی جونیئر نے ایم آر این اے تحقیق کے لیے پچاس کروڑ ڈالر کی کٹوتی کی، حالانکہ یہ ٹیکنالوجی مستقبل میں سرطان کے علاج میں امید بن سکتی ہے۔
ان کی والدہ کیرولین کینیڈی نے بھی رابرٹ ایف کینیڈی جونیئر کی تقرری پر سوال اٹھائے تھے۔ تاتیانا نے کہا کہ ان کی سب سے بڑی فکر ان کے دو چھوٹے بچے ہیں۔ انہیں خوف ہے کہ یہ بچے بڑے ہو کر انہیں یاد رکھ بھی پائیں گے یا نہیں۔ انہوں نے لکھا کہ وہ اپنے شوہر اور خاندان کے ساتھ خوبصورت زندگی گزار رہی تھیں، لیکن اب وقت کا کم ہونا انہیں اندر سے توڑ رہا ہے۔ تاتیانا نے لکھا کہ وہ ہمیشہ ذمہ داری سے زندگی گزارتی رہیں، اچھی بیٹی، بہن، طالبہ اور ماں بننے کی کوشش کی۔ لیکن اب انہیں لگتا ہے کہ وہ اپنے خاندان کے لیے ایک ایسی المیے میں بدل گئی ہیں جسے کوئی روک نہیں سکتا۔