انٹرنیشنل ڈیسک: سنگاپور کے ہندو بورڈ میں مندروں اور  ہندوستانی  ثقافت کے انتظام کے لیے ایک تجربہ کار خاتون کو مقرر کیا گیا ہے۔ سنگاپور میں اہم ہندو مندروں کا انتظام سنبھالنے والے ایک قانونی ادارے '  ہندو اینڈامنٹس بورڈ ' ( ایچ ای بی ) نے عوامی خدمت کے لیے وقف ایک تجربہ کار رہنما کو اپنا نیا چیف ایگزیکٹو آفیسر مقرر کیا ہے۔ سروجنی پدمناتھن کو بدھ کے روز ایچ ای بی کا چیف ایگزیکٹو آفیسر مقرر کیا گیا۔ اپنے چالیس برس کے شاندار کیریئر میں انہوں نے 1990 کی دہائی میں اسپتالوں کی تنظیم نو اور کووڈ 19  وبا کے دوران ادارہ جاتی مضبوطی میں اہم کردار ادا کیا۔
انہوں نے وزارت صحت اور ہیلتھ سائنسز اتھارٹی میں اعلیٰ عہدوں پر خدمات انجام دیں، جہاں انہوں نے طبی، نرسنگ اور انتظامی شعبوں میں افرادی قوت کی ترقی کی قیادت کی۔ ہفتہ وار  'ٹیب لوئیڈ' (جریدے)  'طبلہ '  کے مطابق، 57  سالہ پدمناتھن اس سے قبل ایچ ای بی کی مالیاتی رکن بھی رہ چکی ہیں۔ اس دوران انہوں نے مالی نظم و نسق کو مضبوط بنانے میں نمایاں کردار ادا کیا اور بورڈ کے انتظامی امور سے گہرے طور پر وابستہ رہیں۔
ایچ ای بی کے تحت چار مندر، ایک بحالی مرکز اور مذہبی سرگرمیاں شامل ہیں۔ سال 1968 میں قائم کیے گئے ایچ ای بی نے کہا کہ ان کا قیادتی تجربہ اور مضبوط انتظامی پس منظر انہیں بورڈ کی کمیونٹی پر مبنی سرگرمیوں کی رہنمائی کے لیے موزوں بناتا ہے۔ پدمناتھن جیوگنتھ ارومگم کی جگہ لیں گی، جو ستمبر 2024 سے اس عہدے پر فائز تھے۔ ہندو اینڈامنٹس بورڈ سنگاپور کے اہم ہندو مندروں جیسے شری مری ایمن مندر اور شری شِون مندر کا انتظام سنبھالتا ہے۔ اس کے علاوہ یہ ثقافت، برادری اور نوجوانوں کی وزارت کے تحت  ہندوستانی  برادری کے لیے ثقافتی، مذہبی اور فلاحی پروگراموں کی نگرانی بھی کرتا ہے۔