نیشنل ڈیسک :  حال ہی میں پاکستان اور ہندوستان  کے درمیان جنگ بندی کا اعلان ہوا تھا لیکن پاکستان نے اپنی پرانی عادت کے مطابق اعتماد توڑ دیا۔ جنگ بندی کے اعلان کے صرف تین گھنٹے کے اندر، پاکستان نے جموں و کشمیر میں فائرنگ شروع کر دی اور ڈرون حملے کئے۔ کانگریس کے رکن پارلیمنٹ ششی تھرور نے پاکستان کے اس اقدام پر ناراضگی کا اظہار کرتے ہوئے اپنے سوشل میڈیا پلیٹ فارم X پر شدید طنز کیا۔

ششی تھرور نے ایکس پر پوسٹ کیا اور لکھا  کہ اس کی فطرت ہے مکر جانے کی ، میں اس کے وعدے  پر یقین کیسے  کروں ؟" اس تبصرے کے ذریعے انہوں نے پاکستان کے فریب پر سوالات اٹھائے اور یہ بھی واضح کیا کہ اس پر اعتبار کرنا مشکل ہے۔

جنگ بندی کے اعلان کے بعد ششی تھرور نے شام کو میڈیا سے بات چیت میں کہا تھا کہ ہندوستان کبھی جنگ نہیں چاہتا بلکہ صرف دہشت گردوں کو سبق سکھانا چاہتا ہے۔ انہوں نے کہا کہ ہندوستان  نے پہلگام میں دہشت گردانہ حملے کے جواب میں کارروائی کی اور پاکستان کے زیر قبضہ کشمیر (پی او کے)میں فضائی حملوں کے ذریعے دہشت گردوں کے ٹھکانوں کو تباہ کر دیا۔ انہوں نے یہ بھی واضح کیا کہ ہندوستان نے فوجی اڈوں یا عام شہریوں کو نشانہ نہیں بنایا۔
ہندوستان اور پاکستان کے درمیان  ہوئی تھی جنگ بندی
گزشتہ چار دنوں سے پاکستان ہندوستان کی سرحد پر ڈرون اور میزائل حملے کر رہا تھا۔ ہندوستان  نے ہر حملے کا منہ توڑ جواب دیا۔ اس کے باوجود ہفتے کے روز دونوں ممالک نے زمین، آسمان اور سمندر پر جاری دشمنی ختم کرنے پر اتفاق کیا۔ اس جنگ بندی کا اعلان سب سے پہلے امریکی صدر ڈونالڈ ٹرمپ نے اپنے سوشل اکاؤنٹ پر کیا۔ اس کے بعد ہندوستان کے خارجہ سکریٹری وکرم مصری نے باضابطہ طور پر اس کی تصدیق کی۔
پاکستان نے فوری طور پر کی جنگ بندی کی خلاف ورزی 
تاہم جنگ بندی کے اعلان کے چند گھنٹوں کے اندر ہی جموں و کشمیر میں مشتبہ ڈرون سرگرمی دیکھی گئی۔ رات گئے دھماکوں کی آوازیں بھی سنی گئیں۔ ہندوستانی  فوج نے فوری جوابی کارروائی کرتے ہوئے اپنے فضائی دفاعی نظام کا استعمال کرتے ہوئے ڈرون کو مار گرایا۔
رات 11 بجے سیکرٹری خارجہ وکرم مصری نے ایک ہنگامی پریس کانفرنس میں بتایا کہ پاکستان نے جنگ بندی کی خلاف ورزی کی ہے اور ہندوستانی مسلح افواج نے منہ توڑ جواب دیا ہے۔ انہوں نے یہ بھی کہا کہ ہندوستان  اور پاکستان کے فوجی حکام کے درمیان بات چیت میں جنگ بندی پر اتفاق ہوا تھا لیکن پاکستان کی جانب سے بار بار اس کی خلاف ورزی کی جا رہی ہے۔ ایسے میں ہندوستانی فوج کو سخت کارروائی کرنے کا حکم دیا گیا ہے۔