انٹرنیشنل ڈیسک:  سال 2025 میں ہندوستانی  شہریوں کی ملک بدری سے متعلق سامنے آنے والے اعداد و شمار نے عام تصور کو توڑ دیا ہے۔ زیادہ تر لوگ یہ سمجھتے ہیں کہ ڈونالڈ ٹرمپ کے اقتدار میں آنے کے بعد امریکہ سے سب سے زیادہ ہندوستانیوں کو ڈی پورٹ کیا گیا، لیکن وزارتِ خارجہ کے تازہ اعداد و شمار ایک مختلف تصویر پیش کرتے ہیں۔ وزارتِ خارجہ کے مطابق 2025 میں سب سے زیادہ ہندوستانی  شہریوں کو ملک بدر کرنے والا ملک سعودی عرب رہا، جہاں سے تقریبا 11,000  ہندوستانیوں کو واپس بھیجا گیا۔ ان میں زیادہ تر مزدور اور نجی شعبے میں کام کرنے والے ملازمین شامل تھے، جنہیں ویزا کی خلاف ورزی، غیر قانونی قیام، مقررہ مدت سے زیادہ ٹھہرنے یا مقامی قوانین کی خلاف ورزی کے باعث ڈی پورٹ کیا گیا۔ اس کے مقابلے میں امریکہ سے 2025 میں 3,800 ہندوستانیوں کو ملک بدر کیا گیا، جو گزشتہ پانچ برسوں میں سب سے زیادہ ضرور ہے، لیکن سعودی عرب کے اعداد و شمار سے کہیں کم ہے۔
ان میں سے زیادہ تر کارروائیاں واشنگٹن ڈی سی اور ہیوسٹن سے کی گئیں۔ ماہرین کا کہنا ہے کہ ٹرمپ انتظامیہ کے دوران دستاویزات کی سخت جانچ، ورک اجازت نامے اور ویزا اسٹیٹس پر سختی اس کی بڑی وجہ رہی۔ وزارتِ خارجہ کے مطابق خلیجی ممالک میں ہندوستانیوں  کی بڑی آبادی ہونے کی وجہ سے وہاں ملک بدری کے معاملات زیادہ سامنے آتے ہیں۔ سعودی عرب کے علاوہ متحدہ عرب امارات سے 1,469 اور بحرین سے 764  ہندوستانیوں کو بھی واپس بھیجا گیا۔ عام وجوہات میں بغیر درست اجازت نامے کے کام کرنا، آجر سے فرار ہونا، لیبر قوانین کی خلاف ورزی اور دیوانی یا فوجداری مقدمات میں پھنس جانا شامل ہے۔ جنوب مشرقی ایشیا میں ملک بدری کا رجحان مختلف نظر آیا۔ میانمار سے 1,591 اور ملائیشیا سے 1,485 کے ساتھ ساتھ تھائی لینڈ سے 481 اور کمبوڈیا سے 305 ہندوستانیوں کو بھی ڈی پورٹ کیا گیا۔
تیلنگانہ حکومت کی این آر آئی مشاورتی کمیٹی کے نائب صدر بھیما ریڈی کے مطابق ان ممالک میں کئی ہندوستانیوں  کو زیادہ تنخواہ کا لالچ دے کر بلایا جاتا ہے اور بعد میں غیر قانونی سائبر سرگرمیوں میں زبردستی کام کروایا جاتا ہے، جسے سائبر غلامی کہا جا رہا ہے۔ 2025 میں ہندوستان  طلبہ کی ملک بدری کے معاملات میں برطانیہ سرفہرست رہا، جہاں سے 170 طلبہ کو واپس بھیجا گیا۔ اس کے بعد آسٹریلیا سے 114، روس سے 82 اور امریکہ سے 45 طلبہ کو ڈی پورٹ کیا گیا۔ ماہرین کا کہنا ہے کہ ایجنٹوں کی دھوکہ دہی، مقامی قوانین سے لاعلمی، ویزا ضوابط کی خلاف ورزی اور اضافی کمائی کی کوشش میں کیے گئے معمولی جرائم بیرونِ ملک ہندوستانیوں  کے لیے بڑی مشکلات کا سبب بن رہے ہیں۔