انٹرنیشنل ڈیسک: ہندوستان  کے تارکین وطن شہریوں نے ملکی معیشت کو مضبوط کرنے میں نیا ریکارڈ قائم کر دیا ہے۔ مالی سال 2024-25 میں (جو 31 مارچ کو ختم ہوا) ، بیرون ملک رہنے والے ہندوستانیوں نے اپنے خاندانوں کو 135.46 بلین ڈالر(تقریبا 11.63 لاکھ کروڑ روپے) بھیجے۔ یہ اب تک کسی ایک سال میں بھیجی جانے والی سب سے بڑی رقم ہے۔
ترسیلات زر میں سالانہ 14 فیصد اضافہ 
اس رقم میں سال در سال 14.24 فیصد کا اضافہ دیکھا گیا۔ یہ تعداد 8 سال پہلے یعنی 2016-17 میں بھیجے گئے 61 بلین ڈالر سے دوگنا ہے۔ اس کا واضح مطلب ہے کہ بیرون ملک رہنے والے ہندوستانیوں کی آمدنی اور خوشحالی میں اضافہ ہوا ہے اور ہندوستانی افرادی قوت کی بین الاقوامی مانگ میں بھی اضافہ ہوا ہے۔

 امریکہ، سنگاپور، برطانیہ سے آیا45  فیصد پیسہ
ریزرو بینک (RBI) کی رپورٹ کے مطابق، کل ترسیلات زر کا 45  فیصد امریکہ، برطانیہ اور سنگاپور سے آیا۔ وہیں،  خلیجی ممالک سے ترسیلات زر میں بھی کمی دیکھی گئی ہے۔ تیل کی قیمتوں میں کمی کی وجہ سے وہاں سے کم رقم بھیجی جا رہی ہے جس کی بھر پائی مغربی ممالک  سے ہو رہی ہے ۔ ورلڈ بینک کے مطابق، ہندوستان پچھلے 10 سالوں سے سب سے زیادہ ترسیلات زر وصول کرنے والا ملک رہا ہے۔ 2024 میں، ہندوستان پہلے نمبر پر تھا، جب کہ میکسیکو (5.8 لاکھ کروڑ روپے)اور چین (4.1 لاکھ کروڑ روپے)دوسرے اور تیسرے نمبر پر تھے۔ 
تجارتی خسارہ پورا کرنے میں مددگار
آر بی آئی کی رپورٹ سے پتہ چلتا ہے کہ ترسیلات زر صرف آمدنی کا ذریعہ نہیں ہے بلکہ ہندوستان کی معیشت کا ایک مضبوط ستون بھی ہے۔ یہ غیر ملکی سرمایہ کاری (FDI) سے بڑا ذریعہ بن گیا ہے۔ مالی سال 25 میں ہندوستان کا تجارتی خسارہ 287 بلین ڈالر تھا، جس میں سے 47 فیصد ترسیلات زر سے پورا ہوا۔ اس سے یہ واضح ہوتا ہے کہ این آر آئیز کا تعاون ہندوستان کی مالی صحت کے لیے انتہائی اہم ہے۔ ہندوستان کے بیرون ملک مقیم شہری نہ صرف غیر ملکی سرزمین پر کام کر رہے ہیں بلکہ وہ ہندوستان کے اقتصادی مستقبل کی بنیاد بھی مضبوط کر رہے ہیں۔ ترسیلات زر اب نہ صرف خاندان کی مدد بلکہ قومی اقتصادی حکمت عملی کا ایک اہم حصہ بن چکے ہیں۔