بھوپال: بہار اسمبلی انتخابات کے حوالے سے حکومت اور اپوزیشن جماعتوں کے درمیان تشہیری مہم تیز ہو گئی ہے۔ جمعہ کو مدھیہ پردیش کے وزیراعلیٰ موہن یادو نے مغربی چمپارن کے شیرا بازار کھیل کے میدان میں منعقدہ عوامی جلسہ سے خطاب کیا۔ اسٹیج پر بیٹھے رہنماؤں نے ان کا جوش و خروش کے ساتھ استقبال کیا، جس میں مرکزی وزیر ستیش چندر دوبے بھی شامل تھے۔
وزیراعلی موہن یادو نے کانگریس پر حملہ کرتے ہوئے کہا کہ راہل گاندھی اور کانگریس ملک کی بے عزتی کر رہے ہیں۔ انہیں تو ڈوب مرنا چاہیے۔ انہوں نے کہا، کانگریس بیرون ملک جا کر ملک کی بے عزتی کرتی ہے اور فوج کی بہادری پر ثبوت مانگتی ہے۔ وزیر اعظم نریندر مودی کی قیادت میں بی جے پی نے صدر دروپدی مرمو کو ملک کے اعلی عہدے پر پہنچایا، مہادلِت کمیشن بنایا اور او بی سی کمیشن کو آئینی حیثیت دی۔ 
موہن یادو نے عوام سے اپیل کی کہ ایسے رہنما کو منتخب کریں جو ملک کی حفاظت اور عزت کے لیے ہمیشہ کھڑا رہے۔ انہوں نے کہا کہ کانگریس اور راشٹریہ جنتا دل جیسی جماعتیں صرف وعدے کرتی ہیں، جبکہ بی جے پی عوام کے اعتماد اور قومی مفاد کے لیے کام کرتی ہے۔
مرکزی وزیر ستیش چندر دوبے نے کہا کہ بہار میں نتیش کمار کی قیادت میں دوبارہ حکومت بنے گی۔ انہوں نے بتایا کہ 2005 سے پہلے بچے اسکول نہیں جاتے تھے، لیکن نتیش کمار کی قیادت میں تعلیم کے نظام میں بہتری آئی۔ آج وزیر اعلی کی سائیکل اسکیم کے تحت بچے اسکول جاتے ہیں۔ سڑک، بجلی اور دیگر بنیادی سہولیات بھی بہتر ہو گئی ہیں۔ 
بی جے پی رکن پارلیمنٹ ڈاکٹر سنجے جیسوال نے جے ڈی یو کے سابق وزیر خورشید فیروز احمد پر طنز کرتے ہوئے کہا کہ 2020 میں بی جے پی نے انتخابی مہم پوری  ریاست میں بڑے جوش و خروش اور مضبوطی سے چلائی ، لیکن سیکٹا اسمبلی حلقہ میں مہم نہیں ہوئی۔ انہوں نے کہا کہ اس وقت  'ناکام لٹیرا' امیدوار میدان میں تھا، جو سڑک تک کوڈکارتا رھا تھا۔ رکن پارلیمنٹ نے عوام کو خبردار کیا کہ اب لوگ ایسے رہنماؤں کی اصل تصویر اچھی طرح سمجھ چکے ہیں اور ترقی، روزگار اور عوامی مفاد کے مسائل پر توجہ دے رہے ہیں۔