چھترپور :  چھترپور کے ہرپالپور تھانے کے املیا گاؤں کی ایک مسجد میں کچھ شرارتی عناصر نے مسجد کے اندر آگ لگا دی۔ آج صبح جب مسجد کے امام پہنچے تو مسجد میں مذہبی کتابوں سمیت دیگر چیزیں جلی ہوئی پائی گئیں۔ آگ لگنے کے واقعے کے بارے میں گاؤں کے لوگوں کو جیسے ہی اطلاع ملی تو مسجد سے وابستہ لوگ جمع ہو گئے اور ہرپالپور تھانے کی پولیس کو اطلاع دی گئی۔ معاملے کی سنگینی کو دیکھتے ہوئے بھاری پولیس فورس گاؤں پہنچی اور آتش زنی کے واقعے کی تفتیش شروع کر دی۔

پولیس نے اس واقعے میں ملوث چھ شرارتی عناصر پر مقدمہ درج کیا ہے اور واقعے کے ماسٹر مائنڈ ہرش پٹیریا اور منوج پٹیریا کو اترپردیش کے مہوبا سے گرفتار کیا ہے اور اس واقعے میں ملوث کچھ لوگوں کو حراست میں لے کر پوچھ گچھ کر رہی ہے۔

پولیس سپرنٹنڈنٹ اگم جین نے بتایا کہ ہرپالپور تھانہ علاقے کے گرام املیا میں 23-24 اکتوبر کی درمیانی رات کچھ سماج دشمن عناصر نے مسجد میں مذہبی دستاویزات کو جلانے کی کوشش کی۔ معاملے کی سنگینی کو دیکھتے ہوئے فوراً پولیس فورس موقع پر پہنچی اور 326(چھ)بی این ایس کی سنگین دفعات کے تحت مقدمہ درج کیا گیا ہے۔ دو مرکزی ملزم ہرش پٹیریا اور منوج پٹیریا کو گرفتار کیا گیا ہے، جبکہ چار دیگر کی تلاش جاری ہے۔ 
پہلے بھی ان میں سے دو ملزم اسی طرح کے واقعے میں شامل رہے ہیں۔ ایس پی نے واضح کیا کہ مذہبی ماحول خراب کرنے والوں پر کسی بھی قسم کی نرمی نہیں برتی جائے گی اور مجرموں کے خلاف سخت کارروائی کی جائے گی۔ وہیں ایس پی نے دیگر مفرور ملزمان پر پانچ ہزار روپے کا انعام بھی اعلان کیا ہے۔