انٹرنیشنل ڈیسک : پولینڈ کے نائب وزیر اعظم اور وزیر خارجہ راڈوسلاؤ  سکورسکی نے پیر کے روز سرحد پار دہشت گردی کے خلاف  ہندوستان  کی پالیسی کی کھل کر حمایت کی۔ نئی دہلی میں وزیر خارجہ ایس جے شنکر سے ملاقات کے دوران سکورسکی نے کہا کہ پولینڈ حال ہی میں دہشت گردانہ  سرگرمیوں کا نشانہ بنا ہے، جب ایک چلتی ہوئی ٹرین کے نیچے ریلوے لائن کو دھماکے سے اڑانے کی کوشش کی گئی۔
انہوں نے کہا کہ دہشت گردوں کی ناکامی کے باعث کوئی جانی نقصان نہیں ہوا، لیکن اس طرح کے واقعات یہ ظاہر کرتے ہیں کہ سرحد پار دہشت گردی ایک سنگین عالمی چیلنج ہے۔ سِکورسکی نے ایس جے شنکر کی اس بات سے بھی اتفاق کیا کہ مخصوص ممالک کو نشانہ بنا کر عائد کیے جانے والے ٹیرف بین الاقوامی تجارت میں عدم توازن اور عالمی عدم استحکام پیدا کر سکتے ہیں۔
جواب میں ایس جے شنکر نے کہا کہ صرف مخصوص ٹیرف ہی نہیں بلکہ دیگر شعبوں میں بھی امتیازی رویے دیکھنے کو ملتے ہیں، جن پر گفتگو ضروری ہے۔ دونوں رہنماؤں نے مشترکہ تاریخی تجربات کا حوالہ دیتے ہوئے کہا کہ  ہندوستان اور پولینڈ اپنے اپنے خطوں میں ابھرتی ہوئی طاقتیں ہیں اور نئی امکانات پر مل کر کام کر سکتے ہیں۔
سِکورسکی نے یورپ میں  ہندوستان  کے فعال کردار کی تعریف کی اور کہا کہ ہندوستان کی جانب سے مختلف یورپی ممالک میں سفارت خانے کھولنا، یورپی یونین کے ساتھ مضبوط تعلقات کی سنجیدگی کو ظاہر کرتا ہے۔