ممبئی:  اداکار سیف علی خان پر رات 2:30 بجے چوروں نے چاقو سے حملہ کیا جس کی وجہ سے اداکار شدید زخمی ہوگئے جنہیں فوری طور پر ہسپتال میں داخل کرایا گیا۔ اب سیف کا ہسپتال میں علاج چل رہا ہے، جب کہ پولیس معاملے کی تحقیقات میں مصروف ہے۔ دریں اثنا، خبریں سامنے آئی ہیں کہ پولیس نے سیف پر حملے کے معاملے میں تین مشتبہ افراد کو حراست میں لے لیا ہے اور انہیں پوچھ گچھ کے لیے تھانے لے جایا گیا ہے۔

دراصل،  سیف علی خان پر بدھ کی رات دیر گئے ممبئی کے باندرہ (مغرب)میں واقع ان کے گھر پر 'ڈکیتی' کی کوشش میں ایک گھسنے والے نے حملہ کیا۔ اطلاعات کے مطابق نوکرانی نے سب سے پہلے چور کو دیکھا۔ دونوں کے درمیان جھگڑا ہوا اور جب اداکار نے صورتحال کو ٹالنے کی کوشش کی تو چورنے ان پر کئی بار وار کئے۔پولیس نے حملے کی تحقیقات شروع کر دی ہیں۔

 حملہ آور کے خلاف ایف آئی آر درج کر لی گئی ہے۔ رپورٹ کے مطابق سیف کو چھ چوٹیں آئی ہیں جن میں سے دو گہری چوٹیں ہیں۔ ایک چوٹ ان کی ریڑھ کی ہڈی کے قریب ہے جس کے لیے ان کی سرجری ہوئی ہے۔

بتادیں کہ حال ہی میں سیف علی خان کی ٹیم نے ان پر حملے پر ایک بیان جاری کیا تھا، جس میں انہوں نے کہا تھا کہ سیف کے باندرہ اپارٹمنٹ میں چوری اور ڈکیتی کی کوشش کی گئی تھی۔ اس دوران سیف پر حملہ کیا گیا۔ اس وقت ہسپتال میں ان کی سرجری جاری ہے۔ ہم میڈیا اور مداحوں سے صبر و تحمل سے کام لینے کی درخواست کرتے ہیں۔ یہ پولیس کا معاملہ ہے۔