انٹرنیشنل ڈیسک: پاکستان کے لاہور میں رمضان کے دوران سبزیوں، پھلوں اور باورچی خانے کے ضروری سامان کی قیمتوں میں مسلسل تیسرے دن اضافہ ریکارڈ کیا گیا ہے۔ یہ صورت حال اس وقت ہے جب حکومت کی جانب سے قائم کیے گئے رمضان سہولت بازاروں میں نسبتاً کم قیمتوں پر سامان فراہم کیا جا رہا ہے۔ یہ معلومات دی ایکسپریس ٹریبیون کی رپورٹ میں دی گئی ہیں۔ رپورٹ کے مطابق، کھلے بازاروں میں آلو 40–50 پاکستانی روپے فی کلو، پیاز 90 روپے، ٹماٹر 150 روپے، ادرک 350 روپے اور لہسن 750 روپے فی کلو تک فروخت ہو رہا ہے۔ پھلوں کی قیمتیں اس سے بھی زیادہ ہیں، سیب 550 روپے، سنگترہ 450 روپے، انار 900 روپے، کیلا 300 روپے درجن اور امرود 300 روپے فی کلو تک پہنچ گیا ہے۔ اس کے برعکس، سرکاری سہولت بازاروں میں قیمتیں نسبتاً کم ہیں، جس کی وجہ سے وہاں بہت زیادہ رش دیکھا جا رہا ہے۔

کئی صارفین کا کہنا ہے کہ کھلے بازاروں میں منافع خوری بڑھ گئی ہے۔ ضلعی انتظامیہ نے 3,424 دکانوں کا معائنہ کر کے 8,52,000 روپے جرمانہ عائد کیا، 11 دکانوں کو سیل کیا اور 12 مقدمات درج کیے۔ تاہم، مہنگائی کا دباو¿ برقرار ہے۔ پاکستان بیورو آف اسٹیٹسٹکس کے مطابق 19 فروری کو ختم ہونے والے ہفتے میں حساس قیمت اشاریہ سالانہ بنیاد پر 5.19 فیصد بڑھا، جو مسلسل 29 واں ہفتہ وار اضافہ ہے۔ لاہور چیمبر آف کامرس اینڈ انڈسٹری نے بھی ابتدائی رمضان میں بڑھتی قیمتوں پر تشویش ظاہر کی ہے۔ جبکہ پنجاب حکومت امدادی اقدامات کی بات کر رہی ہے، لیکن عام شہریوں کا کہنا ہے کہ انہیں ٹھوس ریلیف ابھی تک نہیں مل سکا ہے۔