انٹرنیشنل ڈیسک: وینزویلا پر امریکہ کے حملے اور وہاں کے صدر نکولس مادورو کی گرفتاری کے بعد اب ایک نیا خوف سامنے آیا ہے۔ یہ خوف گرین لینڈ کو لے کر ہے۔ امریکی کارروائی کے فورا بعد ڈونالڈ ٹرمپ کے حامیوں کی جانب سے گرین لینڈ کے بارے میں بیانات سامنے آنے لگے ہیں، جس سے یہ خدشہ بڑھ گیا ہے کہ امریکہ گرین لینڈ پر قبضہ کرنے کی کوشش کر سکتا ہے۔
سوشل میڈیا پوسٹ سے تشویش میں اضافہ
وینزویلا پر امریکی ایکشن کے چند ہی گھنٹوں بعد، ایک دائیں بازو کی پوڈکاسٹر کیٹی ملر نے سوشل میڈیا پلیٹ فارم ایکس پر گرین لینڈ کا ایک نقشہ پوسٹ کیا۔ اس نقشے پر امریکی پرچم بنا ہوا تھا اور نیچے لکھا تھا، جلد( SOON ) ۔ کیٹی ملر، ڈونالڈ ٹرمپ کے قریبی ساتھی اور سابق ڈپٹی چیف آف اسٹاف اسٹیفن ملر کی اہلیہ ہیں۔ اس پوسٹ کے سامنے آتے ہی ڈنمارک اور گرین لینڈ میں ناراضگی اور تشویش دیکھنے میں آئی۔
ڈنمارک نے سخت اعتراض ظاہر کیا
امریکا میں ڈنمارک کے سفیر جیسپر مولر سورینسن نے اس پوسٹ پر ردعمل دیا۔ انہوں نے کہا کہ امریکہ اور ڈنمارک پرانے اور قابلِ اعتماد اتحادی رہے ہیں اور دونوں ممالک مل کر آرکٹک خطے کی سلامتی کے لیے کام کرتے ہیں۔ انہوں نے یہ بھی کہا کہ امریکہ کی سلامتی براہِ راست گرین لینڈ اور ڈنمارک کی سلامتی سے جڑی ہوئی ہے۔ سفیر نے بتایا کہ ڈنمارک نے 2025 میں اپنا دفاعی بجٹ بڑھا کر تقریباً 13.7 ارب ڈالر کر دیا ہے، تاکہ آرکٹک اور نارتھ اٹلانٹک خطے کی سلامتی کو مزید مضبوط بنایا جا سکے۔ ساتھ ہی انہوں نے واضح الفاظ میں کہا کہ ڈنمارک اپنی سرحدوں اور خودمختاری کے مکمل احترام کی توقع رکھتا ہے۔
گرین لینڈ کے لیے امریکہ کا خصوصی ایلچی
ڈونالڈ ٹرمپ نے حال ہی میں لوزیانا کے گورنر جیف لینڈری کو گرین لینڈ کے لیے امریکہ کا خصوصی ایلچی مقرر کیا ہے۔ اس تقرری پر دسمبر میں ردعمل دیتے ہوئے لینڈری نے کہا تھا کہ گرین لینڈ کو امریکہ کا حصہ بنانا ان کے لیے اعزاز کی بات ہوگی۔ انہوں نے وینزویلا میں مادورو حکومت کو ہٹانے کی امریکی کارروائی کی بھی حمایت کی اور اسے منشیات کے خلاف امریکہ کی جنگ قرار دیا۔
گرین لینڈ کیوں اہم ہے
ڈونالڈ ٹرمپ کے صدر بننے کے بعد سے ہی گرین لینڈ کو لے کر ان کے بیانات یورپی ممالک کی تشویش بڑھاتے رہے ہیں۔ گرین لینڈ کو حکمتِ عملی کے لحاظ سے بے حد اہم سمجھا جاتا ہے کیونکہ یہاں مستقبل میں معدنی وسائل کے بڑے ذخائر ملنے کا امکان ہے۔ یہاں امریکہ کا سب سے شمالی فوجی اڈہ پیتوفک اسپیس بیس  (Pituffik Space Base) موجود ہے۔ مارچ کے مہینے میں امریکی نائب صدر جے ڈی وینس نے اس فوجی اڈے کا دورہ بھی کیا تھا۔
ٹرمپ پہلے بھی فوجی کارروائی کی بات کر چکے ہیں
ڈونالڈ ٹرمپ پہلے یہ کہہ چکے ہیں کہ وہ گرین لینڈ پر قبضے کے لیے فوجی کارروائی کے امکان کو رد نہیں کرتے۔ ایک انٹرویو میں انہوں نے کہا تھا کہ بین الاقوامی سلامتی کے لیے امریکہ کو گرین لینڈ کی بہت ضرورت ہے۔ ان بیانات کے بعد ڈنمارک کی خفیہ ایجنسی نے امریکہ کو سلامتی کے لیے خطرہ تک قرار دیا تھا۔ ماہرین کا ماننا ہے کہ یہ صورتِ حال امریکہ اور یورپ کے تعلقات میں بڑی تبدیلی کا اشارہ ہو سکتی ہے۔
گرین لینڈ اور ڈنمارک کا واضح پیغام
ڈنمارک اور گرین لینڈ، دونوں کے وزرائے اعظم نے واضح کیا ہے کہ کسی بھی ملک کی سرحدیں اور اس کی خودمختاری بین الاقوامی قانون کے تحت طے ہوتی ہیں۔ انہوں نے کہا کہ کسی بھی ملک کو دوسرے ملک پر زبردستی قبضہ کرنے کا حق نہیں ہے۔ گرین لینڈ کی تقریباً 57 ہزار آبادی میں سے زیادہ تر لوگ ڈنمارک سے آزادی چاہتے ہیں لیکن امریکا کا حصہ بننا نہیں چاہتے۔