چنڈی گڑھ : پنجاب کے ضلع فتح گڑھ صاحب ایک پیڑ کی وجہ سے کافی سرخیاں بٹور رہا ہے ۔ اسے چاہے لوگوں کا یقین کہیں یا توہم پرستی ۔  لیکن اس پیڑ کی وجہ سے لوگوں میں خوف ہے ۔ ہم بات کررہے ہیں ضلع فتح گڑھ صاحب کے چروٹی کلاں گاؤں کی ۔ یہاں ایک ایسا برگد ہے جس کی جڑیں جس کھیت میں جاتی ہیں ۔ وہاں کسان کھیتی بند کردیتے ہیں ۔ 

اتنا ہی نہیں لوگوں کا یقین ہے کہ اگر کوئی اس پیڑ کی جڑیں کاٹتا ہے تو اس کی یا اس کے پریوار کے کسی نہ کسی ممبر کی موت ہو جاتی ہے ۔ یہ جگہ چنڈی گڑھ سے قریب 40 کلو میٹر دور ہے ۔ کئی سال سے اس کے چلتے  کھیتی پر بحران بنا ہوا ہے ۔ کوئی بھی اس پیڑ کو کاٹنے کی ہمت نہیں کرتا ۔ ابھی تک یہ پیڑ 4 ایکڑ میں پھیل کر کسانوں کی کھیتی باڑی بند کروا چکا ہے ۔ 

سینکڑوں سال پرانا ہے یہ برگد کا پیڑ
گاؤں والوں کے مطابق برگز کا یہ پیڑ سینکڑوں سال پرانا ہے جو لگاتار بڑھ رہا ہے ۔ گاؤں والے بتاتے ہیں کہ پہلے تو ہمیں اس پیڑ کی اس طرح کی کوئی جانکاری نہیں تھی لیکن جب ایک کسان کے کھیت میں اس پیڑ کی جڑیں پہنچی تو اس نے وہ کاٹ دیں ، کچھ ہی دنوں بعد اس کی موت ہوگئی ۔ اسے عقیدت کہیں یا توہم پرستی لیکن گاؤں والے اسے کاٹنے کی بھول نہیں کرتے بلکہ چپ چاپ اپنی زمین چھوڑ دیتے ہیں ۔ 
اس پیڑ کے نزدیک شو مندر ہے ۔ لوگوں کا کہنا ہے کہ سینکڑوں سال پہلے اس جگہ پر ایک سنت آئے تھے جنہوں نے ایک کسان کو اولاد کی پیدائش کیلئے بھسم دی تھی  اور اس کی اہلیہ اسے کھانے سے منع کردیا تھا ۔  اس کسان نے یہ بھسم سنت کو لوٹانا چاہی  تو انہوں نے اسے لینے انکار کردیا ۔ کسان نے بھسم کو زمین پر رکھ دیا ۔ کہتے ہیں اسی جگہ پر ایک برگد کے پیڑ نے جنم لیا  جو صدیوں سے وسیع شکل اختیار کرتا جارہا ہے ۔ ایسی مانا جاتا ہے کہ  یہاں پر سچے من سے منت کرنے پر انسان کی ہر مراد پوری ہوتی ہے ۔